«Տաղանդներ ենք փնտրում» խորագրում այս անգամ NEWS.am STYLE-ի ուշադությունը գրավեց մասնագիտությամբ սոցիոլոգ Լեւոն Ազիզյանը, որի մասին մեզ պատմեց Լեւոնի մտերիմ ընկերը` դերասան Հայկո Հովհաննիսյանը:
Լեւոնը մի քանի ամիս առաջ է սկսել զբաղվել պրոֆեսիոնալ երգեցողությամբ.
«Սովորում եմ Երգի պետական թատրոնում եւ հաճախում եմ վոկալի անհատական դասընթացների: Երգում եմ տարբեր ժանրերում, բայց ինձ ավելի հոգեհարազատ է դասական ոճը»,-NEWS.am STYLE-ի հետ զրույցում նշեց սկսնակ երգիչը` հավելելով, որ երաժշտական ընտանիքում է մեծացել.
«Շատ եմ սիրում լսել Անդրեա Բոչելլի, Ֆրենկ Սինատրա… Երեւի հենց նրանք են ինձ ոգեշնչում»:
Ի տարբերություն շատ սկսնակ երգիչների` Լեւոնը մրցույթների մասնակցելու ցանկություն չունի, սակայն նշում է.
«Երգարվեստում հայտնվելու նպատակներ կան. աշխատում եմ այդ ուղղությամբ: Թեեւ ավարտել եմ Երեւանի պետական համալսարանի սոցիոլոգիայի ֆակուլտետը, այժմ ամեն ինչ փորձում եմ կապել միայն երաժշտության հետ»:
Լեւոնի յուրահատուկ տեմբրին ծանոթանալու համար առաջարկում ենք լսել Ֆրենկ Սինատրայի «My Way» երգի նրա cover կատարումը:
Սյունե Առաքելյան