Քիմ Քարդաշյանը՝ ալկոհոլի, թմրանյութերի, հոր, Քանյե Ուեսթի եւ այլնի մասին՝ Էնդի Կոհենի շոուում

Մի քանի օր Քիմ Քարդաշյանը լուռ էր՝ մեդիա տարածքը զիջելով ավագ քրոջը՝ Քորթնի Քարդաշյանին, ով Կաննում հայտնվել էր նոր սիրեկանի՝ Յունես Բենջիմի հետ:
Եվ ահա Քիմը վերադարձել է. 36-ամյա հայուհին մասնակցել է Watch What Happens Live with Andy Cohen շոուին, որտեղ, ինչպես վստահեցնում է հենց Էնդի Կոհենը, Քիմը պատասխանել է բացառապես բոլոր հարցերին, որոնք նրա հետ նախապես չէին քննարկվել:

Հաղորդավարի հարցին, թե ինչպե՞ս է Հոլիվուդում ապրող եւ շոու բիզնեսի աստղ համարվող Քարդաշյանների գերդաստանին հաջողվում խուսափել ալկոհոլից ու թմրանյութերից, Քիմը պատասխանել է.

«Դրանում հորս ներդրումը կա: Երբ ես 14 տարեկան էի, նա ինձ սովորեցրեց մեքենա վարել: Այն ժամանակ բջջայիններ չկային, եւ ես Քորթնիին ու Քլոեին տանում էի երեկույթների եւ միշտ նրանց հետ էի, հետեւում էի նրանց, որովհետեւ այդ պատասխանատվությունը դրված էր ինձ վրա: Հորս ազդեցությունը եւ այն, որ նա ինձ սովորեցրել է պատասխանատու լինել, հիմնական պատճառն է, որը մեզ թույլ չի տվել ներքաշվել մութ գործերում: Քլոեն ինչ-որ ժամանակ խմում էր, բայց արագ հրաժարվեց: Իսկ թմրանյութերով երբեք չենք տարվել»:

Այնուհետեւ հաջորդել է Փերիս Հիլթոնի հետ հարաբերությունների մասին հարցը, ում հետ Քիմը կապերը խզել էր վեց տարի առաջ: «Փերիսի հետ մենք հաշտվել ենք: Հիմա ես նրա հետ շփվում եմ»,- պատասխանել է Քիմը:

Հարցին, թե ինչպե՞ս է Քանյեն վերաբերվում Քիմի հրապարակային լինելուն, նա անկեղծորեն պատասխանել է. «Քանյեն հրապարակայնություն չի սիրում: Այո՛, նա ստիպված է ներկայանալ հանրությանն այն պատճառով, որ հայտնի է եւ որ այդպիսի կարիերա է ստեղծել, նա ստիպված է տուրք տալ հանրությանը:

Բայց դա նրան դուր չի գալիս, նա ներփակված է, իսկ ես՝ հակառակը, շատ բաց եմ եւ ինձ միշտ գրավել է հանրությանը ներկայանալու հանգամանքը: Սրանք երկու ծայրահեղություն են, բայց վերջին իրադարձությունները (Քիմը նկատի է ունեցել Փարիզում իրեն կողոպտելու դեպքը - խմբ.) փոքր-ինչ փոխեցին մեր դիրքորոշումները: Այն ժամանակ ես պարփակվեցի, իսկ Քանյեն սկսեց դրսեւորվել մեդիադաշտում: Մենք շատ էինք խոսում, ես ոչ մի հրապարակային դրսեւորում չէի ցանկանում, աստիճանաբար մենք գտանք ոսկե միջինը, նա դարձավ ավելի բաց, ես՝ մի քիչ ավելի զուսպ»: