Հարրի Փոթերի երկրպագուները երիտասարդ Վոլդեմորտի մասին ֆիլմ են նկարահանել

Youtube-ի TRYANGLE FILMS ալիքում հրապարակվել է երիտասարդ Հարրի Փոթերի մասին ֆիլմաշարից Վոլդեմորտի մասին պատմող Voldemort: Origins of the Heir («Վոլդեմորտ. Ժառանգորդի ծագումը») ֆիլմի անոնսը:

Այն պատմում է Թոմ Ռեդլի կյանքի մասին՝ Հոգվարթս դպրոցն ավարտելուց հետո։

Ֆիլմի շուրջ աշխատանքները մեկնարկել են 2016 թվականի սկզբին, երբ ֆիլմի ստեղծողները վերընթերցել են Ջոան Ռոուլինգի «Հարրի Փոթերն ու կիսաազնվական արքայազնը» գիրքն ու մտածել, թե ինչու Ռեդլը Վոլդեմորտ դարձավ։

Ժապավենը պատմելու է կախարդի կյանքի այն ժամանակաշրջանի մասին, քանի դեռ նա չէր դարձել «Նա, ում անունը չի կարելի տալ»: Թոմ Ռեդլը 1943 թվականին ավարտում է Հոգվարթսից եւ սպանում Հեփզիբ Սմիթին՝ Պենելոպա Պուֆենդույի գավաթին եւ Սալազար Սլիզերինի մեդալյոնին տիրանալու համար: Գոդրիկ Գրիֆինդորի ժառանգորդուհին հետաքննում է գործն ու փորձում կանգնեցնել չարագործին (Ջոան Ռոուլինգի գրքերից գիտենք, որ չի հաջողվում):

Ժապավենի համար միջոցներ են հավաքագրել Kickstarter քրաուդֆանդինգային հարթակում: Դրամահավաքը մեկնարկել է 2016 թվականին, մարդիկ մինչեւ հիմա շարունակում են դրամական միջոցներ փոխանցել նախագծի համար: Warner Bros. ընկերությունը, որին պատկանում է Հարրի Փոթերի մասին ֆիլմերի իրավունքը, դեմ չէ նախագծին. Tryangle ստուդիան պաշտոնապես թույլտվություն է ստացել: Ջոան Ռոուլինգը նույնպես հավանության է արժանացրել նախագիծն ու նույնիսկ Twitter-ում գովաբանել նախաձեռնողներին:

Ֆիլմի պրեմիերան կայանալու է 2017 թվականի աշնանը YouTube-ում: