Օպերայի մոտ միշտ բլյուզ է լսվում:
Ու հարցը ժանրը չէ:
Ոչ էլ անգամ այն, որ այս քաղաքում մոլորվել հնարավոր չէ:
Դուրս գալ սենյակից, ճանապարհից թեքվել յոթ «շլակբաումից» այն կողմ ու պատահաբար դեմ առնել կյանքին:
Կոնսերվատորիայի մոտ ամեն երեկո Գևորգը՝ վանդակավոր կլյոշ շալվարով ու կիթառով, նվագում է հատուկ քեզ համար: Ամեն անգամ, երբ կիթառի լարը փրթվում է, փոխում է այն` ասելով. «Բիլլի, արվեստը չի մեռնում»:
Այսօր Բիլլին կլինեմ ես ու կհավատամ:
Ու կձևացնեմ, թե հավատում եմ:
Այս քաղաքում ապրում են ֆանտաստիկ մարդիկ ու ժամանակ չունեն կյանքի մասին մտածելու:
Նրանք ժամանակ չունեն մտածելու, դրա համար նվագում են:
Ամեն երեկո քեռի Կոմիտասը մի քիչ դառնում է Բիլլի ու փորձում է չմտածել: Կոնսերվատորիայում տարօրինակ լուրեր են տարածվել`
քաղաքի,
կյանքի,
լարերի մասին:
Գևը կատարում է «Լռությունը», ու հարցը ժանրը չէ:
Այս քաղաքում ապում են նրանք, ովքեր կարողանում են ապրել ու նրանք, ովքեր՝ չէ:
Նստարանին շարվում են երևանցիներ, հնդիկներ, աֆրոամերիկացիներ (ավելի քիչ Ամերիկա, ավելի շատ Աֆրո), ու սա հիանալի է՝ հաշվի առնելով, որ վերջիններս ստեղծել են բլյուզը, ինչպես նաև վաղ ջազն ու ռեգթայմը:
Բիլլի, ով էլ որ դու լինես, թքած ստեղծողների վրա՝ պահիր ռիթմը:
Աղջիկը վազում է վանդակավոր կլյոշ շալվարով ու կլոր ակնոցով կիթառահարի մոտ, դնում է փողը ճամպրուկի վրա ու արագ հետ վազում մոր մոտ:
Մի օր Գևորգը այս ճամպրուկով կթռչի ուրիշ քաղաք՝ մոլորվելու:
Իսկ մինչ այդ, բոլոր նրանց համար, ովքեր դեռ Բիլլի են՝ արվեստը չի մեռնում:
Վեներա Ավետիսյան