Վահե Ալեքսանյանը՝ «Կայարան»-ում այլեւս չնկարահանվելու, ֆիթնեսով տարվելու եւ ամառային հանգստի մասին

Երաժշտական նախագծերից հայտնի երգիչ Վահե Ալեքսանյանին հեռուստադիտողը կարճ ժամանակով տեսավ «Կայարան» հեռուստասերիալում, սակայն այս շրջանում երգիչն այլեւս չի նկարահանվում հեռուստասերիալում, իսկ պատճառների մասին Վահեն պատմել է NEWS.am STYLE-ին: Երգչի հետ զրուցել ենք նաեւ իր նոր հոբբիի եւ ամառային հանգստի մասին.

««Կայարան»-ում հիմա չեմ նկարահանվում երկրից բացակայելու պատճառով, բայց ուրախ եմ, որ առաջին քայլերն արել եմ արդեն: Հուսով եմ՝ դեռ կհանդիպենք ֆիլմի շրջանակներում»,-նշեց Վահեն՝ հավելելով.

«Լավ առաջարկներ լինելու դեպքում՝ մեծ սիրով կնկարահանվեմ ե՛ւ ֆիլմերում, ե՛ւ սերիալներում»:

Երգչի Facebook-ի էջի հետեւորդները հավանաբար նկատել են, որ վերջին շրջանում Վահեն ակտիվորեն զբաղվում է սպորտով:

«Միշտ զբաղվել եմ սպորտով: Այժմ կենտրոնացած եմ fitness bodybuilding-ի վրա: Գեղեցիկ մարմին ունենալը կարեւոր է՝ անկախ նրանից արտիստ ես, թե ոչ»,-կարծում է երգիչը, որը երկրպագուների համար երաժշտական անակնկալներ էլ է պատրաստել:

«Ունեմ նոր երգ եւ տեսահոլովակ: Բառերի հեղինակն Ալեքս Միրզոյանն է, իսկ երաժշտությունը գրել եմ ես: Այն շուտով կհանձնենք հեռուստադիտողի դատին»:

Չշրջանցեցիցնք նաեւ շոգ ամռան եւ հանգստի թեման, ինչին երգիչը խորհրդավոր պատասխան տվեց.
«Անկախ եղանակից՝ պետք է օրդ բազմաժանր լինի, լի իրադարձություններով: Չէ՞ որ, կորցնելով լիարժեքության զգացումն ու զանազանությունը, սկսում ես ուղղակի գոյատեւել»,-եզրափակեց նա:

Սյունե Առաքելյան

Լուսանկարները՝ Վահե Ալեքսանյանի Facebook-ի էջից