Մասնագետի խորհուրդները. ձվային թերապիա չոր մազերի համար

21:12   13 ապրիլի, 2013

Չոր մազերի (նաեւ՝ յուղոտ) համար դիմակները 1000 եւ ավելի դրամ արժեն: Սակայն կարելի՞ է գնված ապրանքները փոխարինել տնային բաղադրատոմսերով եւ արդյո՞ք արդյունքը նույնը կլինի: Այս հարցով NEWS.am STYLE-ը դիմեց վարսահարդար Հասմիկ Դավթյանին:

«Մազերի դիմակների դեպքում գինը նշանակություն չունի, քանի որ չոր մազերի խմանքի համար կարելի է հրաշալի օգնական գտնել ինչպես 1000, այնպես էլ 10.000 դրամով: Սակայն տնական միջոցները շատ ավելի արդյունավետ են, քանի որ ավելի պակաս քիմիա են պարունակում եւ, համապատասխանաբար, նպաստում են ավելորդ չորության արագ հեռացմանը եւ վարսերն ավելի փայլուն եւ ուժեղ են դարձնում:

Չոր մազերի դեպքում խորհուրդ եմ տալիս, այսպես կոչված, ձվային թերապիան: Գոյություն ունեն մի քանի բաղադրատոմսեր, որոնց օգնությամբ դիմակներ են պատրաստվում վնասված կամ այնպիսի մազերի համար, որոնք չոր են բնականից:

1. Ձվա-սխտորային դիմակը պատրաստվում է 1 դեղնուցի, 1 թեյի գդալ մեղրի, 1 ճաշի գդալ մայոնեզի եւ նախապես մանրացված 2 սխտորի պճեղի օգնությամբ: Դիմակը քսել մազերի ամբողջ երկարությամբ, ներառյալ՝ արմատները: Այնուհետեւ հագնել պոլիէթիլենից գլխարկ եւ գլուխը փաթաթել սրբիչով: Շուրջ կես ժամ անց մազերը խնամքով լվանալ շամպունով:

2. Կարելի է պատրաստել նաեւ ձվա-քացախային դիմակ, քանի որ հայտնի է, որ քացախը հիանալիորեն փափկացնում է մազերը եւ դրանց փայլ հաղորդում: Այս դիմակի արդյունավետության մեջ համոզվելու համար հարկավոր է 1 ձուն խառնել 1 թեյի գդալ քացախի եւ 1 թեյի գդալ գլիցերինի հետ: Ստացված զանգվածին ավելացնել 2 ճաշի գդալ գերչակի յուղ: Նախորդ դիմակի նման, քսել մազերի ամբողջ երկարությամբ: Կես ժամ անց շամպունով լվանալ:

3. Մեղրա-կոնյակային դիմակ չոր մազերի համար: Կոնյակը նաեւ փայլ է հաղորդում մազերին, իսկ դիմակի մյուս բաղադրիչները բառացիորեն կենդանացնում են մազերը եւ դրանք արտաքնապես ավելի հրապուրիչ դարձնում: Այս դիմակը պատրաստելու համար անհրաժեշտ է 1 դեղնուց, 1 թեյի գդալ կոնյակ, նույնքան մեղր եւ 1 ճաշի գդալ զեյթունի ձեթ: Զանգվածը քսել մազերի ամբողջ երկարությամբ եւ պոլիէթիլենի գլխարկի եւ սրբիչի օգնությամբ շոգեբաղնիքի արդյունք ստացեք: 2.5 ժամ անց դիմակը լվանալ, ինչից հետո մազերը շամպունով լվանալ:

2-3 նման գործողությունից հետո դուք կնկատեք փոփոխությունը դեպի լավը»:



© NEWS.am STYLE