«Դեռահաս աղջիկ է, որը սովորում է երեւակայական դպրոցում». Դալիթան՝ «Նվագախմբի երեխաները» մյուզիքլում իր կերպարի մասին

Աշնանը հայկական հեռուստաէկրաններին կհայտնվի նոր նախագիծ՝ «Նվագախմբի երեխաները», որտեղ հեռուստադիտողը կտեսնի մի շարք տաղանդավոր երեխաների, այդ թվում նաեւ երգչուհի Դալիթային, որը վերջերս վերադարձավ հայրենիք՝ ֆրանսիական Pierre Cardin-ի «Միսս Տիեզերք» գեղեցկության եւ նորաձեւության մրցույթում տարած հաղթանակով:

Գեղեցկուհին NEWS.am STYLE-ի հետ զրույցում խոսել է իր մասնակցությամբ նոր մանկապատանեկան երաժշտական ֆիլմի մասին.

«Նկարահանվելու առաջարկը ստացել եմ նախագծի կազմակերպիչներից: Բնականաբար, նկարագրությունը լսելուց հետո չէի կարող չոգեւորվել, քանի որ սյուժեն իսկապես շատ լավն էր: Մասնակցեցի քասթինգին եւ, ի ուրախություն ինձ, անցա այն, ու սկսվեց մի աննկարագրելի ու հետաքրքիր ընթացք իմ կյանքում»,-պատմում է երգչուհին՝ անդրադառնալով նաեւ իր հերոսուհու կերպարին.

«Հերոսուհիս դեռահաս աղջիկ է, որը սովորում է այդ երեւակայական դպրոցում: Մյուզիքլում նկարահանվել եմ մի շարք երաժշտական հատվածներում, որտեղ մյուս երեխաների պես երգում եմ երգեր, որոնք նոր են եւ հատուկ գրված են մեր հերոսների համար: Նախագծի հերոսները բոլորն էլ որոշակի գործունեություն ծավալած երեխաներ են: Ենթադրում եմ՝ երբ արդեն եթերում լինենք, շատերին հեռուստադիտողը կճանաչի»:
Երգչուհին, սակայն, չցանկացավ առայժմ  խոսել սյուժետային մանրամասներից.

«Կարծում եմ՝ ճիշտ կլինի, որ հեռուստադիտողի հետաքրքրությունը չփչացնենք, եւ նրանք անհամբերությամբ սպասեն այդ ամենին»,-նշեց նա:

Ինչ վերաբերում է նկարահանումների եւ ուսման համատեղելիությանը՝ Դալիթան ասում է.

«Կազմակերպիչներն ամեն բան նկատի են ունեցել, եւ նկարահանումները կազմակերպել են արձակուրդի ընթացքում: Լինում են միջոցառումներ, որոնց մասնակցում եմ, բայց այդ ամենը հարմարեցնում եմ նկարահանող թիմի հետ: Ի դեպ, կազմակերպիչներն ասում են, որ եթերը նախատեսված է աշնանը՝ նոր եթերաշրջանի ժամանակ»,-եզրափակեց երգչուհին:

Սյունե Առաքելյան