«Ես պարսկերեն երգել եմ նպատակային». Ռուբեն Մաթեւոսյանը՝ Լիլիթ Հովհաննիսյանի պարսկերեն կատարման մասին

«Ես պարսկերեն երգել եմ նպատակային»,- NEWS.am STYLE-ի հետ զրույցում, անդրադառնալով Լիլիթ Հովհաննիսյանի կողմից իր պարսկերեն կատարումը համացանցում տեղադրելուն եւ դրա շուրջ ծավալված քննարկումներին, ասաց ՀԽՍՀ ժողովրդական արտիստ Ռուբեն Մաթեւոսյանը:

Նրա խոսքով՝ Իրանում համերգային շրջագայության ընթացքում նա որոշել է պարսկերեն երգ կատարել՝ որպես հարգանքի նշան.

«Ես շրջագայություն եմ ունեցել Իրանում եւ, իբրեւ հայ երգիչ, ես պարտավոր էի իմ ծրագրում ունենալ նաեւ այն երկրի մեղեդին, երգը, որը գրակաբաց ընդունել է իմ հայրենակիցներին եւ այդքան տարի ոչ թե պարզապես տեղ է տվել, այլ մեծ հարգանք է մատուցել: Եվ, վերաջպես, նրանք մեր հարեւաններն են եւ բարի հարեւաններն են, լուսավոր միակ ճանապարհը՝ փակ ժամանակ: Դա հարգանքի նշան է եղել եւ իմ վերաբերմունքը նրանց հանդեպ: Ես ոչ թե համարձակվեցի, այլ իմ պարտքը համարեցի հնչեցնել պարսկերեն երգ»,- ասաց նա՝ հավելելով, որ կատարել է բավականին բարդ երգ եւ դրա համար Հայաստանում արժանացել ոսկե մեդալի:

Ինչ վերաբերվում է Լիլիթ Հովհաննիսյանի պարսկերեն կատարմանը, ապա պարոն Մաթեւոսյանը չի լսել այն, ուստի չի կարող որեւէ բան ասել.

«Եթե լսած լինեի, եւ այն լավը լիներ, կոգեւորեի, եթե վատը լիներ, կասեի՝ գործ չունես, բայց քանի որ չեմ լսել, իրավունք չունեմ որեւէ կարծիք հայտնել»:

Հիշեցնենք, որ վերջերս Լիլիթ Հովհաննիսյանն իր Facebook-յան էջում հայտնել էր, որ բազմաթիվ նամակներ է ստանում իր իրանցի երկրպագուներից՝ խնդրանքով, որ պարսկերեն երգ կատարի: Երգչուհին որոշել է չմերժել երկրպագուներին, սակայն մինչ այդ «նախապատրաստել է» հայ հանրությանն իր պարսկերեն երգին՝ իր էջում հրապարակելով Ռուբեն Մաթեւոսյանի պարսկերեն կատարումը:

«Շատ մեծանուն հայ երգիչներ (Ռուբեն Մաթևոսյան, Օֆելյա Համբարձումյան եւ այլք) երգացանկում միշտ ունեցել են պարսկերեն երգեր: Պարսիկ երգիչները նույնպես շատ անգամներ կատարել են հայկական երգեր… եւ դա հրաշալի է»,- գրել էր Լիլիթը:

Շուշան Շատիկյան