Մնաս բարով, Հենրիխ Մխիթարյան. Նիկոլայ Բասկովն ու Վիկտորիա Լոպիրյովան պատմել են առաջիկա հարսանիքի մասին

Վիկտորիա Լոպիրյովան, որին Հենրիխ Մխիթարյանի հետ սիրավեպ էին վերագրում, եւ երգիչ Նիկոլայ Բասկովը հյուրընկալվել են «Андрей Малахов. Прямой эфир» շոուին եւ պատմել առաջիկա հարսանիքի մասին: Այն տեղի է ունենալու հոկտեմբերի 5-ին` Գրոզնիում:

Արարողության վկաներն են լինելու Չեչնիայի ղեկավար Ռամզան Կադիրովը եւ երգչուհի Վալերիան: Անդրեյ Մալախովը ենթադրություն է հայտնել, որ Լոպիրյովայի հարսանեկան զգեստի հեղինակն անպայման Վալենտին Յուդաշկինն է լինելու: Հաղորդման հյուրերն էլ նշել են, որ, չեչենական ավանդույթների համաձայն, հարսն ու փեսան հարսանիքի ժամանակ չեն կարող համբուրվել եւ ալկոհոլ խմել: Այս դիտարկումը ստուդիայում ծիծաղ է առաջացրել:

Ի դեպ, Բասկովն այլեւս շիկահեր չէ, նա աստիճանաբար վերադարձնում է մազերի բնական գույնը:
«Կարծում եմ, որ առնական տեսք չունեմ Վիկայի հետ: Հիմա «բնական թխահեր» եմ լինելու»,- հայտարարել է Բասկովը:

Նիկոլայը հաստատել է, որ հարսանիքն իսկապես տեղի է ունենալու, բայց ոչ հոկտեմբերի 5-ին, ինչպես սպասվում էր: Հարսանիքի օրը փոխվել է երգչի մոր՝ Ելենա Բասկովայի պատճառով: Նա երիտասարդներին խնդրել է փոխել հարսանիքի օրը, քանի որ այն աստղի հոր հիշատակի օրն է: Սակայն աստղերը որոշել են պահպանել ինտրիգը. հարսանիքի օրվա մասին կհայտնեն ավելի ուշ: Ընդ որում՝ Բասկովը խոստացել է, որ երկու հանդիսություն կկազմակերպվի. մեկը՝ Գրոզնիում, մյուսը՝ Մոսկվայում:

Վիկտորիա Լոպիրյովան, իր հերթին, բավական կոշտ է պատասխանել իրենց զգացմունքների անկեղծության հարցում կասկածողներին:

«Ներեցեք մեզ մեր երջանկության համար եւ անցեք կողքով»,- խնդրել է մոդելը: