Անջելինա Ջոլին ու Գվինեթ Փելթրոուն պրոդյուսեր Հարվի Վայնշթեյնին մեղադրել են սեռական ոտնձգությունների մեջ

Հոլիվուդում հերթական սկանդալն է բորբոքվել։ Հանրահայտ հոլիվուդյան պրոդյուսեր Հարվի Վայնշթեյնին օրերս հեռացրել են հենց նրա հիմնած կինոընկերությունից սեռական ոտնձգությունների պատճառով։ Մի շարք կանայք, այդ թվում դերասանուհի Էշլի Ջադդն ու The Weinstein Co-ի աշխատակիցները պատմել են իրենց աշխատանքի ընդունելու ժամանակ պրոդյուսերի անվայել վարքագծի մասին։

Օրեցօր ավելի շատ դերասանուհիներ են հայտնում պրոդյուսերի անվայել վարքագծի մասին, նրանց են միացել Անջելինա Ջոլին ու Գվինեթ Փելթրոուն։ Times-ին տված հարցազրույցում Անջելինա Ջոլին ու Գվինեթ Փելթրոուն լրագրողներին պատմել են կինոպրոդյուսերի հետ աշխատանքի մասին իրենց հիշողություններն ու ասել, որ իրենք նույնպես սեռական ոտնձգությունների են բախվել։

45-ամյա Փելթրոուն հիշել է, թե ինչպես է 22 տարի առաջ իր գլխավոր դերը ստացել «Էմմա» ֆիլմում, որը նրա առաջին մեծ դերերից մեկն էր։ Նախագծի պրոդյուսերը Հարվի Վայնշթեյնն էր, որը դերասանուհուն սեռական հարաբերություններ էր առաջարկել։

«Ես երեխա էի։ Ինձ հաստատեցին այդ դերի համար։ Ես ցնցված էի»,- հիշում է Գվինեթը։

Նա հավելել է, որ միջադեպի մասին պատմել էր Բրեդ Փիթին, որի հետ այն ժամանակ հանդիպում էր։

Դերասանը փորձել է պարզաբանել հարցերը պրոդյուսերի հետ, իսկ հետագայում Վայնշթեյնը Փելթրոուին խնդրել է, որ նա այդ միջադեպի մասին այլեւս որեւէ մեկին չպատմի։

42-ամյա Անջելինա Ջոլին պրոդյուսերի հետ շփման նույնատիպ փորձ է ունեցել «Սիրո հակառակ կողմը» ֆիլմի նկարահանումների ժամանակ։ Ջոլիի խոսքով՝ Վայնշթեյնը գործնական հանդիպումներից մեկը նշանակել էր հյուրանոցի համարում, որտեղ նրան առաջարկել էր ննջարան գնալ։ «Ես Հարվի Վայնշթեյնի հետ աշխատանքի բացասական փորձ ունեմ պատանեկության տարիներին։

Դրա համար էլ ես որոշել էի այլեւս երբեք նրա հետ չաշխատել ու մյուսներին էլ նախազգուշացնել այդ մասին։ Կանանց հանդեպ նման վերաբերմունքը ցանկացած ոլորտում ու երկրում անընդունելի է»,- պատասխանել է լրագրողներին Ջոլին։