Սիլվեստր Ստալոնեի նախկին կինը հերքում է դերասանի հասցեին սեռական ոտնձգությունների մեղադրանքը

Անցած շաբաթ սեքս-սկանդալի կենտրոնում է հայտնվել 71-ամյա Սիլվեստր Ստալոնեն։ Պարբերականները գրում են, թե Սլայը 1986-ին ստիպել է իր 16-ամյա զուգընկերուհուն սեռական հարաբերություն ունենալ իր թիկնապահի հետ։

Աղջիկը, որը չի նշում իր անունը, հայտնել է, որ միջադեպը տեղի է ունեցել, երբ ինքը 16 տարեկան էր, իսկ Սիլվեստրը՝ 40։ Աղջիկը ոստիկանությանը պատմել է, որ Ստալոնեն իբրեւ ստիպել է իրեն սեքսով զբաղվել միաժամանակ իր ու իր թիկնապահի հետ Լաս Վեգասի Hilton հյուրանոցում։ Աղջիկը խոստովանել է, որ ինքն այդ պահին «ընտրություն չի ունեցել»։ Նաեւ, նրա խոսքով, միջադեպից հետո դերասանը սպառնացել է իրեն, որպեսզի նա ոչ մեկին որեւէ բան չպատմի։

Ոստիկանությանը նա հայտնել է, որ չի ուզում որեւէ պաշտոնական մեղադրանք առաջադրել դերասանի դեմ, քանի որ իրեն «ստորացած ու նվաստացած» է զգում։

Սիլվեստրն ինքը հերքել է այդ մեղադրանքները, իսկ TMZ-ը կապ է հաստատել Բրիջիթ Նիլսոնի հետ, որն այն ժամանակ եղել է դերասանի կինը։

54-ամյա դանիացի մոդելի խոսքով՝ ինքը նկարահանումների ժամանակ մշտապես Ստալոնեի կողքին է եղել.

«Անհնար է, որ Սլայն այդպիսի բան աներ, նա անընդհատ իմ կողքին էր։ Դա 1986-ի ամառն էր, մենք նոր էինք ամուսնացել։ Մենք ոչ մի վայրկյան իրարից չէինք բաժանվում, նույնիսկ նկարահանումներին էի ես ներկա գտնվում։ Մենք համար ունեինք Hilton հյուրանոցում, ուր միայն երկուսով էինք մտնում։ Նա նկարահանվում էր, մենք ընթրում էինք ու գնում մեր համար։ Անհնար է, որ նման բան տեղի ունենար։ Սիլվեստրը չէր կարող անել այն ամենը, ինչում նրան մեղադրում են։ Դժվարանում եմ պատկերացնել անգամ, թե ինչ ապրումներ ունի հիմա նրա ընտանիքը այդ հիմար սկանդալի պատճառով»,- ասել է Բրիջիթը։