«Կա սահման, որը չեմ անցնի նույնիսկ մեծ գումարի դեպքում». Թամարա Գեւորգյանն՝ իր համաձակ ֆոտոշարքի եւ ձմեռային դեպրեսիայի մասին

Դերասանուհի Թամարա Գեւորգյանը հայ հեռուստադիտողին առավել հայտնի դարձավ այս տարի՝ սերիալային կերպարներով  եւ «Իմ անցյալի դիմանկարը» գեղարվեստական ֆիլմում գլխավոր դերով: Վերջերս Թամարան, համագործակցելով լուսանկարիչ Նարեկ Արշակյանի եւ դիմահարդար Իզաբելլա Պապարիցուի հետ, ներկայացրեց բավականին հակարձակ ֆոտոշարք՝ ցուցադրելով սեքսուալ եւ ճակատագրական կնոջ կերպար:

NEWS.am STYLE-ը դերասանուհու հետ հետաքրքիր զրույց է ունեցել, որի ընթացքում Թամարան խոսել է ոչ միայն ֆոտոշարքում իր կերպարի, այլեւ գալիք Ամանորի եւ դրան նախորդող դեպրեսիայի մասին.

Թամարա, սեքսուալ ֆոտոշարք իրականացնելիս կարեւոր է չանցնել վուլգարության սահմանը: Հե՞շտ էր դա պահելը:

Մարդ կամ վուլգար է, կամ՝ ոչ: Սահմաններն ինձ թվում է՝ շատ ներքին են: Միգուցե, միեւնույն բանը անեն երկու տարբեր մարդիկ՝ մեկինը վուլգար ստացվի, մյուսինը՝ ոչ:

Կանայք տարբեր կերպ են ընկալում սեքսուալ լինելը: Քեզ համար ո՞րն է կնոջ գրավչության գաղտնիքը:

Կարծում եմ՝ գրավչության գաղտնիքն ինքնատիպությունն է…

Սերիալներում քո կերպարները, սովորաբար, ունեն բացասական գիծ: Ի՞նչ ես կարծում` ինչո՞ւ են ռեժիսորները քեզ հենց այդպիսի կերպարում տեսնում:

Առաջին նախագծում բացասական կերպարով հանդես եկա, ասում են՝ ստացվեց: Եւ դա երեւի արդեն այդպես էլ ընկալվեց: Ինձ թվում է՝ առաջիկայում կփոխվի այդ կարծրատիպը: Թատրոնում մի շարք դրական կերպարների եմ մարմնավորել: Ես երկու տեսակների մեջ էլ ինձ հարմարավետ եմ զգում:

Որպես դերասանուհի` ավելի համարձակ ֆոտոշարքերի կամ դերերի պատրա՞ստ ես: Կա՞ սահման, որը չես անցնի անգամ լավագույն առաջարկի կամ բարձր գումարի դեպքում:

Որպես դերասանուհի… ճիշտ եք՝ այո, որպես դերասանուհի կարող եմ: Չեմ քննադատում ոչ մեկին, ամեն մարդ ունի իր կարծիքը: Բայց ես հստակ գիտեմ, որ դերասանուհին պետք է ճկուն լինի եւ ամեն կերպ էլ կարողանա ներկայանալ: Այլ հարց է, թե ինչ շուկա է քեզ դա առաջարկում, ու ինչ արդյունք կլինի: Կա սահման, որը չեմ անցնի, իհարկե, նույնիսկ՝ մեծ գումարի դեպքում: Բայց նորից կրկնեմ՝ սահմանները շատ ներքին են ու անհատական:

Տարին մոտենում է ավարտին: Շատերի մոտ արդեն սկսվել է ձմեռային դեպրեսիսան: Եղանակային փոփոխություններն ազդո՞ւմ են քեզ վրա:

Ճիշտն ասած՝ միշտ ունեցել եմ ոչ թե ձմեռային, այլ նախատոնական դեպրեսիա: Այդ տոնական իրավիճակն ինձ միշտ դեպրեսիայի մեջ էր գցում: Բայց հիմա աշխատում եմ ինձ վրա ու տրամադրվում: Ահասարակ, կարողանում եմ աշխատել թերություններիս վրա՝ փորձելով շտկել դրանք:

Ամփոփելով այս տարին` կնշե՞ս ստեղծագործական ի՞նչ ձեռքբերումեր ունեցար եւ ի՞նչ է սպասվում 2018 թ-ին:

Ամփոփելով տարին՝ կարող եմ ասել, որ այն չափազանց հագեցած էր: Կորուստների ու ձեռքբերումների տարի էր: Ստեղծագործական առումով կարող էր ավելի լավը լիներ: Բայց 2017-ն ինձ չափազանց կարեւոր մարդկանց նվիրեց, իսկ ավելորդներին՝ հեռացրեց…Մյուս տարին էլ ավելի լավ է լինելու (ժպտում է):

Սյունե Առաքելյան