Սերժ Թանկյանը Հայոց ցեղասպանության մասին ֆիլմերի ու երկրաշարժի մասին «Սպիտակ» նոր ֆիլմի մասին

Rolling Stones-ին տված հարցազրույցում SOAD-ի ֆրոնթմեն Սերժ Թանկյանը խոսել է Հայոց ցեղասպանության մասին «Ոչնչացնելու մտադրություն», «Խոստում» ֆիլմերի եւ երկրաշարժի մասին «Սպիտակ» ֆիլմի մասին։  Երաժիշտը նշել է, որ հիմա ինքն ավելի շատ ուզում է երաժշտություն ստեղծել, քան սովորական ռոք երգեր գրել։

 «Հիմա ես երաժշտություն եմ գրում «Սպիտակ» ֆիլմի համար, որը ռուս- հայկական համատեղ արտադրության ֆիլմ է 1988-ի երկրաշարժի մասին։ Շատ ծանր ֆիլմ է։ Դեռ միայն կեսն եմ գրել, երաժշտությունը տեղ- տեղ թեթեւ կլինի, տեղ – տեղ՝ ողբերգական, տեղ- տեղ՝ վառ։ Երբ ես ֆիլմերի համար երաժշտություն եմ գրում, ես չեմ համարում, որ դա պետք է անպայման ռոք լինի»։

Սերժ Թանկյանը նաեւ խոսել է «Ոչնչացնելու մտադրություն» ֆիլմի մասին (Intent to Destroy)։

«Անհավանական ֆիլմ է Հայոց ցեղասպանության ժխտման մասին։ Այս թեման շատ հոգեհարազատ է ինձ, քանի որ իմ պապն ու տատը այդ ողբերգությունից հազիվ են փրկվել։ Իմ ամբողջ կարիերայի ընթացքում ես խոսում եմ Հայոց ցեղասպանության ու այդ Ցեղասպանության եւ աշխարհի ներկա իրադարձությունների կապի մասին։ Ես շատ զգացմունքներ եմ ներդրել այդ ֆիլմի համար ստեղծած երաժշտության մեջ։ Ես գիշերները նստում էի ստուդիայում, նայում ֆիլմի կադրերը, իսկ ֆիլմը հրաշալի է նկարահանված, Ջո Բեոլինջերը՝ հանճարեղ ռեժիսոր լինելով, կարողացել է այնքան շատ բան փոխանցել այդ ֆիլմի միջոցավ։ Ինձ թվում է, որ ես կարողացել եմ երաժշտության մեջ արտահայտել այն, ինչ զգում էին այդ ֆիլմի հերոսները»,- պատմում է Թանկյանը՝ հավելելով, որ նույն ձեւով է ստեղծել նաեւ «Խոստումը» ֆիլմի երաժշտությունը։

«Խոստումը» ֆիլմի վերջում կա մի տեսարան, որը ինձ մինչեւ հոգուս խորքը հուզել է։ Երբ Քրիսթիան Բեյլը մտնում է հյուրանոց ու հայտնում , որ սպանում են կանանց, տղամարդկանց ու երեխաներին։ Սա ֆիլմի ամենաազդեցիկ պահն է։ 15 վայրկյան է տեւում, բայց շատ ազդեցիկ է»,- անկեղծացել է Սերժը։