2018-ի նորաձեւության թրենդները․ խորհուրդներ դիզայներ Լեւոն Ալաջալյանի կողմից
14:02 26 դեկտեմբերի, 2017Վերջին մի քանի տարիներին Նորաձեւության շաբաթների բարձրաշխարհիկ նորաձեւությունն աղետալի անկում է ապրում, մինչդեռ փողոցային ոճը սկսել է նվաճել պոդիումներն ու բազմաթիվ տղամարդկանց սրտերն ամբողջ աշխարհում, ինչպես նաեւ Հայաստանում։ Այդ իսկ պատճառով այսօր հայ դիզայներ Լեւոն Ալաջալյանը NEWS.am STYLE-ի համար կպատմի տղամարդկանց street fasion –ի թրենդների մասին, որոնք պահանջված են լինելու 2018-ին։
«Փողոցային ոճի համար ամենակարեւորը հարմարավետությունն է, համապատասխանաբար, զգեստապահարանում պետք է լինեն հարմարավետ ու պրակտիկ իրեր։ Դրա համար էլ փողոցային ոճի հավերժ թրենդն է ջինսը, որը պետք է լինի յուրաքանչյուր երիտասարդի զգեստապահարանում։ Տաբատի գունային գամման կարող է շատ տարբեր լինել՝ դասական կապույտից մինչեւ սեւ, մոխրագույն, թեթեւակիորեն մաշած։ Ու ջինսը չպետք է չափից շատ ընդգրկի մարմինը։
2018-ին նաեւ նորաձեւ կլինեն մարզաշապիկները, բոմբերները, սվիթշոթերը՝ մինիմալիստական ու փոքր փրինթներով։ Քանի որ մենք Հայաստանում ենք ապրում, մեզ համար ավելի հոգեհարազատ է հայկական գրություններով ու կարգախոսերով հագուստը, հայկական պատմական կամ կատակերգական հերոսների պատկերներով։
Ամբողջ աշխարհի տղամարդկանց համար 2018-ին ոճային ու ակտուալ են լինելու տարբեր համադրություններով վառ երանգները։ Բայց ոչ բոլոր հայ տղամարդիկ ու տղաներն են պատրաստ հագնել կարմիր, դեղին կամ մանուշակագույն հագուստ, դրա համար էլ մենք առաջարկում ենք նախապատվությունը տալ դասականին՝ սեւ, մուգ կապույտ, մոխրագույն, խակի, շագանակագույն։
Ուզում եմ ուշադրություն հրավիրել այն հանգամանքին, որ 2018-ին նույնպես տղամարդկանց նորաձեւ աքսեսուարներից է լինելու ուսապարկը։ Բոլոր տղաները պետք է ունենան գոնե մեկ ուսապարկ ու կարեւոր չէ, նրանք դրանով աշխատանքի կգնան, քաղաք , թե մարզվելու։ Ուսապարկ ընտրելիս ավելի լավ է զերծ մնալ վառ գույներից կամ նկարներից՝ վերցրեք միագույն ուսապարկ, այդ դեպքում այն կդառնա ունիվերսալ ատրիբուտ ու կսազի ձեր բոլոր լուքերին։
Մարգարիտա Ավագյան