Մերիլ Սթրիփը հորդորել է Մելանիա և Իվանկա Թրամփերին քննադատել Հարվի Վայնշթեյնի անբարո վարքը

68-ամյա դերասանուհի Մերիլ Սթրիփը The New York Times պարբերականին տված հարցազրույցում՝ նորից անդրադարձել է հոլիվուդյան ազդեցիկ կինոպրոդյուսեր Հարվի Վայնշթեյնի շուրջ դեռ նախորդ տարեվերջին ծավալված սեքս սկանդալին և մեղադրել նրան դերասանուհիների նկատմամբ սեռական ոտնձգությունների համար:

Նախորդ տարեվերջին Մերիլ Սթրիփն ինքն էլ հայտնվել էր Վայնշթեյնի անվան շուրջ ծավալված աղմկահարույց պատմությունների կիզակետում: Գործընկերները Սթրիփին մեղադրում էին այն բանում, որ նա Վայնշթայնի անբարո վարքի մասին իմանալուց հետո անգամ շարունակել է համագործակցել նրա հետ: Լոս- Անջելեսի փողոցներում անգամ Սթրիփի և Վայնշայնի դիմանկաներով մեղադրական պաստառներ էին տեղադրվել՝ ի ցույց բոլորի:

Իր հարցազրույցում, սակայն, հոլիվուդյան դերասանուհին հերթական անգամ խոստովանել է, որ ինքը մինչև վերջերս տեղյակ չի եղել Վայնշթեյնի անբարո վարքի մասին:

«Ես չեմ օգտվում սոցիալական ցանցերից, ուստի հնարավորություն չունեի ծանոթանալու Վայնշթեյնին վերաբերող բոլոր փաստերին, և ժամանակ էր հարկավոր բոլոր տեղեկությունները վերլուծելու համար: Այն, ինչ բացահայտեցի, վկայում է իմ անզորության և Հարվիի երկերեսանիության, կեղծավորության մասին: Պարզվեց, որ նա բավականին բացասական, չար մարդ է, թեև իր գործի վարպետն է: Քեզ թվում է, որ դու ամեն ինչ գիտես կինոոլորտում աշխատողների մասին, քանի որ պարբերաբար շփվոմ ես նրանց հետ, նկարահանվում ֆիլմերում: Ի վերջո մեր ոլորտում բամբասանքները շատ են, և դժվար է դրանցից զանազանել ճշմատությունը: Հետո պարզվում է, որ դու իրականում այդ մարդկանց մասին ոչինչ չգիտես: Ես իսկապես Հարվիի կյանքի մասին ոչինչ չգիտեի: Երբ լսում էի դերասանուհիների հանդեպ նրա սեռական ոտնձգությունների մասին, մտածում էի, որ նման տեղեկություններ տարածելով՝ փորձ է արվում հեղինակազրկել նրանց, ներկայացնել, թե այդ կանայք անկողնու շնորհիվ են դերեր ստանում: Այնինչ Հարվին դա օգտագործում էր իր հաճույքները բավարարելու համար՝ դերասանուհիներին պարտադրելով սեռական հարաբերությունների մեջ մտնել իր հետ: Նա երբեք ինձ հյուրանոց չի հրավիրել, և ես չէի մտածում, որ այն ինչ խոսում են նրա մասին, կարող է իրականություն լինել»,- պարբերականին տված հարցազրույցում ասել է դերասանուհին:

Մերիլը նաև հորդորել է Մելանիա և Իվանկա Թրամփերին խախտել լռությունը և խոսել Վայնշթայնի արարքի մասին, քննադատել այն, որպեսզի պրոդյուսերի վարքը դաս դառնա մյուսների համար: Դերասանուհին նաև հույս է հայտնել որ առաջին տիկինը և ԱՄՆ նախագահի դուստրը կմիանան սեռական ոտնձգությունների դեմ ձևավորված #MeToo շարժմանը:

Հիշեցնենք, որ հոկտեմբերին մի քանի տասնյակ կին Վայնշթեյնին մեղադրել է սեռական ոտնձգությունների ու բռնաբարությունների համար: Նրանց թվում են Կառա Դելևինը, Լեա Սեյդուն, Անջելինա Ջոլին, Կադիան Նոբլը:

Սկանդալից հետո, Հարվի Վայնշթեյնը հեռացվել է Ամերիկյան կինոարվեստի և գիտության ակադեմիայից: Այս քայլով վերջնական հարված է հասցվել Հոլիվուդի ամենաազդեցիկ պրոդյուսերի կարիերային, որին ավելի վաղ ժամանակավորապես հեռացրել էին իր իսկ հիմնած Miramax և Weinstein Company ընկերություններից: Վայնշտայնի անդամակցությունը դադարեցրել է նաև BAFTA բրիտանական կինոակադեմիան: Ամերիկյան կինոակադեմիայից նշել են, որ այս որոշումը կայացրել են կինոարվեստում ամոթալի վարքին և սեռական ոտնձգություններին վերջ դնելու նպատակով։