Աշխարհում ամենահայտնի հնդիկ դերասաններից մեկը՝ Հրիթիկ Ռոշանը, այսօր՝ հունվարի 10-ին, նշում է ծննդյան տարեդարձը: Բոլիվուդի ամենաբարձր վարձատրվող դերասաններից մեկը համարվող Ռոշանը դարձավ 44 տարեկան:
Կանաչաչյա դերասանն աչքի է ընկնում ոչ միայն իր հմայիչ արտաքինով, այլեւ պարելու հմտություններով: Դերասանն իր գործունեության ընթացքում նկարահանվել է մի քանի տասնյակ ֆիլմերում, որոնցից հատկապես հայտնի է «Ջոդհա Ակբար» ֆիլմը, որտեղ նրա խաղընկերուհին գեղեցկուհի Այշվարիա Ռայն է:
Այսօր ներկայացնում ենք Ռոշանի հայտնի մեջբերումներից մի քանիսը:
«Կյանքը քեզ կարող է ուժեղ հարվածներ տալ: Դու ինքդ պետք է որոշես՝ սուպերհերոս ես, թե ոչ: Ես ընտրում եմ առաջին տարբերակը»:
«Ես կարող եմ լինել լավագույն Ջեյմս Բոնդը»:
«Աշխարհը նպաստում է, որպեսզի դու զարգանաս: Դու պետք է աճես՝ անկախ կյանքում տեղի ունեցող ողբերգություններից: Եթե չես աճում, ուրեմն արդեն ծեր ես»:
«Ինձ այնքան են բարձրացրել, որ եթե ընկնեմ, շատ ցավոտ կլինի»:
«Ես ինձ լավ դերասան չեմ համարում»:
«Ես չեմ սիրում խաղալ: Ես պետք է վերապրեմ տվյալ հերոսին, հետո ցուցադրեմ նրան էկրանին»:
«Ես շատ ժամանակ եմ ծախսում, որպեսզի կարդամ իմ կերպարի մտքերը, հետո վերածեմ դրանք բառերի: Ես իսկապես պետք է դառնամ այն մարդը, որին մարմնավորում եմ»:
«Ես ամենալավ իսպանական օմլետն եմ պատրաստում, բայց բաղադրատոմսը չեմ բացահայտի երբեք»:
«Եթե ֆիլմը լավն է, այն անկախ ամեն ինչից հաջողության կհասնի»:
«Կարծում եմ՝ պարտադիր չէ, որ դերասանը տարված լինի իր արտաքինով: Շատ մարդկանց գիտեմ, ովքեր նույնիսկ հայելու մեջ չեն նայում: Հիմա ես այդ ուղղությամբ եմ գնում»: