«Ունիվեր» սերիալի աստղ Անդրեյ Գայդուլյանն օգնել է աղջկան հաղթահարել քաղցկեղը

«Ունիվեր» եւ «ՍաշաՏանյա» սերիալների աստղ Անդրեյ Գայդուլյանի մոտ 2015-ի հուլիսին հայտնաբերել էին լիմֆոմա։ Դերասանը քիմիաթերապիայի մի քանի կուրս էր անցել ու հետազոտվել Գերմանիայում։ Վերջերս, Անդրեյի խոսքով, իրեն ոչինչ չի անհանգստացնում։ Բայց դերասանն իր խնդիրների պատճառով չի մեկուսացել։ Անդրեյը, որը հաղթահարել է ուռուցքաբանական հիվանդությունը, հիմա էլ ուրիշներին է ակտիվ օգնում։ Դերասանից օգնություն է ստացել նաև Մարիա Լեբեդևան։

Մեկուկես տարի առաջ Գայդուլյանը սկսել էր գումար հավաքել նրա բուժման համար։ Ու ահա արդեն իր Instagram-ում դերասանը հայտնել է, որ Ռոստովում բնակվող Մարիայի առողջական վիճակը լավացել է.

«Ձեր՝ բարի հիմնադրամների ու բլոգերների օգնությամբ, մենք փակեցինք դրամահավաքը 2017-ի դեկտեմբերի 31-ին։ Մաշան ավարտել է բուժումը, իսկ մեկ շաբաթ առաջ նա մեկնել է Գերմանիա՝ հետազոտության։ Ու մենք կարող ենք շշուկով, շատ զգուշորեն ասել, որ հետազոտությունը Մաշայի մոտ հայտնաբերել է զարգացող ռեմիսիա։ Փառք Աստծուն»,- գրել է դերասանն ու հրապարակել Լեբեդևայի հետ լուսանկար։

Նա շնորհակալություն է հայտնել բոլորին կարեկցանքի ու օգնության համար.

«Ես անսահման շնորհակալ եմ բոլորից ու հպարտ եմ Ձեզնով»,- նշել է Անդրեյը։

Դերասանը շարունակելու է պատմել այն մարդկանց մասին, ում ֆինանսական օգնություն է պետք բուժվելու համար։ Անդրեյը համարում է, որ ցանկացած գումար օգտակար կլինի։ Լեբեդևան շնորհակալություն է հայտնել Գայդուլյանին.

«Միասին մարդիկ կարող են հրաշքներ արարել՝ ցանկացած օգնությամբ դուք կարող եք երջանկություն պարգևել ընտանիքին։ Դուք իմ դստերը նվիրել եք մայր, իսկ իմ մայրիկին՝ դուստր։ Թող Աստված Ձեզ առողջություն, երջանկություն ու բարեկեցություն տա։ Ես միշտ կաղոթեմ Ձեզ համար»,- գրել է նա։