«Реальные пацаны» սերիալի աստղ Արմեն Բեժանյանին հարկադրաբար են տարել դատարան
14:35 22 փետրվարի, 2018«Реальные пацаны» սերիալի աստղ Արմեն Բեժանյանին Պերմում դատում են, հայտնում է properm.ru-ն։ Դերասանի ու գործարարի նկատմամբ հարուցվել է քրեական գործ՝ «Խաբեության կամ վստահության չարաշահման միջոցով ունեցվածքային վնաս պատճառելու խոշոր մասշտաբների փորձ՝ հափշտակման նշանների բացակայությամբ»։
Դատավարության սկզբում Բեժանյանի նոր փաստաբանը ժամանակ է խնդրել գործին ծանոթանալու համար։ Դատավորը մեկ ժամով հետաձգել է նիստը։ Դրանից հետո դերասանը դատարանին ներկայացրել է տեղեկանք իր հիվանդության մասին, ու դատական նիստը հետաձգել են ևս երեք ժամով։
Կայքի թղթակիցը դատարանի դահլիճից հայտնել է, որ ժամը 14։00-ին հայտնի է դարձել, որ դատարանը որոշում է կայացրել Արմեն Բեժանյանին բերել դատարանի դահլիճ։ Ըստ երևույթին, դերասանի հիվանդության մասին տեղեկությունները չեն հաստատվել։ Տղամարդը չի ներկայացել դատարան՝ չունենալով հարգելի պատճառներ, դրա համար էլ ոստիկանները ստիպված են եղել նրան հակադրաբար բերել դատարան։
Հիմա դատական լսումները շարունակվում են։
2016-ի վերջին Օս քաղաքի դատախազությունը պարզել էր, որ դերասանը կադաստրի հաշվառման է ներկայացրել ու անավարտ շինությունների նկատմամբ իրավունքներ գրանցել այն հողատարծանքերում, որոնք վարձակալել էր Օսի քաղաքապետարանից։ Իրականում այդ հողատարածքում ոչ մի շինություն չի եղել, ու դերասանը կեղծ տեխնիկական հատակագծեր է ներկայացրել անավարտ շինությունների առկայության մասին, որոնք կադաստրի ինժեները գրանցել է առանց ստուգելու՝ վստահելով վարձակալողի խոսքին։
Դրանից հետո Բեժանյանը քաղաքապետարանին խնդրել է երկարացնել հողատարածքների վարձակալության ժամկետը՝ առանց սակարկությունների, քանի որ այնտեղ «գտնվում է» անշարժ գույք, որի սեփականատերն ինքն է։ Հաշվի առնելով այն փաստը, որ ըստ փաստաթղթերի՝ վարձակալողն այդ հողատարածքում ուներ կառույցներ, վարձակալության գումարը կազմել է տարեկան 928,5 ռուբլի՝ այդ բոլոր երեք հողատարածքների համար։ Դատախազության հաշվարկներով՝ Բեժանյանի գործողությունների հետևանքով Օսի բյուջեին պատճառվել է ավելի քան 560 հազար ռուբլու վնաս։