Ամերիկացի դերասանուհի Դակոտա Ֆենինգն այսօր՝ փետրվարի 23-ին, նշում է ծննդյան 24-ամյակը: Կապուտաչյա գեղեցկուհին ճանաչում ձեռք է բերել դեռեւս փոքր տարիքից` նկարահանվելով այնպիսի ֆիլմերում, ինչպիսիրք են` «Ես Սեմն եմ», «Աշխարհների պատերազմը», «Շարլոտայի սարդոստայնը» եւ այլն:
Նա հայտնի է նաեւ «Մթնշաղ» ֆիլմում իր դերով, որտեղ մարմնավորում է վամպիրուհի Ջեյնին:
Ապագա աստղի մոտ դերասանական տաղանդը հայտնաբերվել է վաղ տարիքից: Երբ աղջիկը չորս տարեկան էր, ծնողները որոշում են նրան ընդունել տանից ոչ հեռու գտնվող թատերական խմբակ, որտեղ հաճախակի էին ներկայացումներ բեմադրվում, իսկ Դակոտան կարճ ժամանակում դարձավ այդ ներկայացումների անբաժան մասնիկը: Նկատելով աղջկա անսովոր տաղանդը` ուսուցիչները Դակոտայի ծնողներին խորհուրդ են տալիս ավելի լրջորեն զբաղվել նրա կարիերայով: Շուտով փոքրիկ դերասանուհու համար գործակալ են գտնում, որի խորհրդով էլ Ֆենինգի ընտանիքը տեղափոխվում է Լոս Անջելես` ավելի լայն հնարավորությունների հետեւից:
Երբ վեց շաբաթ անց Դակոտայի ծնողները որոշում են վերադառնալ տուն, աղջիկն անսպասելի նկարահանման առաջարկ է ստանում` Tide ապրանքանիշի գովազդային հոլովակում: Այդպես էլ սկսվում է Դակոտա Ֆենինգի հաջողությունը. շուտով նա սկսում է նկարահանվել հոլիվուդյան ֆիլմերում` կերտելով իր ուղին կինոյի արտասովոր աշխարհում:
Հետաքրքիր արտաքինի շնորհիվ աղջկան հրավիրում են նաեւ լուսանկարվել հեղինակավոր ամսագրերի շապիկներին եւ ամենահայտնի բրենդների գովազդային արշավներում:
Ներկայացնում ենք Դակոտա Ֆենինգի արտահայտած մտքերից մի քանիսը.
«Կարծում եմ՝ նախորդ կյանքում ես ճապոնացի դպրոցական եմ եղել: Ահա, թե որքան եմ սիրում Hello Kitty-ին»:
«Մարդիկ միշտ խոսել են իմ մասին իմ մեծ ու կապույտ աչքերի շնորհիվ»:
«Ինձ դուր է գալիս իմ կյանքը, իմ էությունը, սակայն եթե ինձ բախտ վիճակվեր մի քանի վայրկյանով դառնալ այլ մարդ, դա կլիներ Բեյոնսեն»:
«Դերասանությունն այն է, ինչ ես սիրում եմ: Դա ինձ համար աշխատանք չէ, դա հաճույք է»:
«Ես երկու տարեկանում արդեն գիտեի կարդալ…»:
«Ֆիլմերը, որքան եւ արդեն բարձրաձայնված բառերի մասին են, նույնքան էլ իրենց մեջ լռություն են պարունակում»:
«Երկու տարեկանում բալետի էի հաճախում, բայց արդեն երազում էի դերասանուհի դառնալու մասին»:
«Կցանկանայի հանդիպել Ջուլիա Ռոբերթսին եւ Քեմերոն Դիասին: Կարծում եմ՝ կարող էի մարմնավորել նրանց դստեր դերը»:
«Իմ ծնողները երբեք ինձ երեխայի պես չեն վերաբերվել. երեւի դրա համար էլ միշտ հասուն եմ երեւացել»:
«Իմ խաղացած ցանկացած դեր իր մեջ երազանքի մի մասնիկ է պարունակել»:
Լուսանկարները՝ Facebook-ից