«Սիրում եմ ազատություն, բայց չեմ խառնում դա սանձարձակության հետ». Անյա Սահակյանն իր նոր դերի մասին

Օրեր առաջ «Արմենիա Պրեմիում» հեռուստաաալիքի եթերում մեկնարկեց ռեժիսոր Վարդան Հակոբյանի «Ավազե դղյակը» հեռուստասերիալը, որտեղ հեռուստադիտողը հնարավորություն կունենա հետեւելու Yere1 սիթքոմից հայտնի դերասանուհի Անյա Սահակյանի խաղին: Երկար տարիներ սերիալներում չնկարահանվելուց հետո Անյան որոշեց էկրաններ վերադառնալ հենց այս նախագծով: NEWS.am STYLE-ը դերասանուհու հետ զրուցել է իր նոր դերի եւ եթերային վերադարձի մասին.

«Սերիալում մարմնավորում եմ Ալլա անունով մի աղջկա, որը մեծահարուստի աղջիկ է, շատ ազատամիտ ու սանձարձակ է, քանի որ ընտանիքի հարստությունը փչացրել է նրան: Աղջիկը շատ եսասեր է մեծացել եւ հաշվի չի նստում ոչ ոքի հետ, նույնիսկ՝ ընտանիքի անդամների: Մի խոսքով՝ ազատության մեջ մեծացած, ազատություն սիրող «լկստված» աղջիկ է:)»,-պատմում է Անյան, որի խաղն անմիջականորեն կապված է դերասաններ Անուշիկ Առաքելյանի եւ Արթուր Կարապետյանի հետ.

«Նրանք մարմնավորում են իմ ծնողներին: Նրանց շատ եմ սիրում, հաճելի խաղընկերներ են»,-ասում է նա:

Թեեւ Անյան երկար ժամանակ եթերում չէր, նրա հետ զրուցելու առիթներ էլի եղել են, եւ այդ զրույցների ընթացքում դերասանուհին իր էկրանային լռությունը բացատրում էր նրանով, որ շատ բծախնդիր է վերաբերվում յուրաքանչյուր առաջարկի: Նրանից հետաքրքրվեցինք՝ ինչով այս նոր նախագիծը գրավեց նրա ուշադրությունը.

«Իսկապես բծախնդիր եմ յուրաքանչյուր նախագիծ ընտրելիս, իսկ այս նախագիծն ինձ գրավեց հենց Ալլայի կերպարով: Երբեւէ բացասական դեր չէի մարմնավորել, ինձ գրավեց ազատության հանդեպ նրա սերը, ուժեղ կերպարը, քանի որ ինքս ազատությունը գնահատող մարդ եմ: Բայց բացի ազատության հանդեպ սիրուց եւ ուժեղ լինելուց՝ կերպարս ոչ մի այլ բանով ինձ նման չէ: Սիրում եմ ազատություն, բայց չեմ խառնում դա սանձարձակության հետ: Ի տարբերություն հերոսուհուս՝ ինձ համար իմ ընտանիքը միշտ առաջին տեղում է»,-եզրափակեց դերասանուհին:

Սյունե Առաքելյան

Լուսանկարները՝ Անյա Սահակյանի Facebook-ի էջից