«Մենք ոչնչով չենք կարող օգնել». Գոհար Ավետիսյանը՝ հայաստանյան ցույցերի մասին
14:06 20 ապրիլի, 2018Հայաստանում քաղաքացիական անհնազանդության երթերը շարունակվում են արդեն մեկ շաբաթից ավելի: Աստիճանաբար քաղաքացիներին են միանում նաեւ հայտնի մարդիկ: Նրանցից ոմանք մասնակցում են ցույցերին, ոմանք՝ սահմանափակվում սոցցանցերում գրառումներ անելով:
Այս առումով հատկապես ակտիվ են Սփյուռքում բնակվող հայերը: Այսպես, Հայաստանում տեղի ունեցող իրադարձություններին է անդրադարձել ՌԴ-ում հայտնի դիմահարդար Գոհար Ավետիսյանը: Նա իր Instagram-ում ցույցերից մի կադր է հրապարակել եւ գրել.
«Շատ եմ ցավում՝ տեսնելով, թե ինչ է կատարվում հիմա իմ Հայաստանում: Այնպես եմ ցավում քաղաքացիների համար... Ամենասարսափելին այն է, որ մենք ոչնչով չենք կարող օգնել... Ես ամեն առավոտ արթնանաում եմ այն մտքով, թե ինչ կարող եմ անել, որպեսզի խաղաղ քաղաքացիները չտանջվեն... եւ պատասխան չեմ գտնում:
Ես գլուխ չեմ հանում քաղաքականությունից եւ ատում եմ քաղաքական գրառումներն այնպիսիններից, ինչպիսին ես եմ, որոնք ոչինչ չգիտեն այդ ամենի մասին... Բայց ես պարզապես չէի կարող լռել:
Իմ հարազատներ, պինդ կացեք, մենք ձեզ հետ ենք եւ ցանկանում ենք, որ ամեն ինչ արագ կարգավորվի եւ արդարությունը վերականգնվի»: