«Եվրատեսիլ 2018»․ Eurovoxx կայքը՝ Սևակ Խանաղյանի փորձի մասին
11:05 1 մայիսի, 2018Լիսաբոնում, «Եվրատեսիլ» երգի մրցույթի շրջանակում, արդեն սկսվել են առաջին փորձերը։ Երեկ տեղի է ունեցել Հայաստանի ներկայացուցիչ՝ Սևակ Խանագյանի առաջին փորձը, որից անմիջապես հետո նա մամուլի ասուլիսի ժամանակ կիսվել է իր տպավորություններով և պատմել է իր ելույթի մասին։
Երաժշտական մրցույթի ամենահայտնի կայքերից մեկը՝ բրիտանական Eurovoxx բլոգը, նույնպես իր տպավորություններն է գրել հայ երգչի առաջին փորձի մասին։ Էնդին ու Ջեսսը նշել են, որ Սևակի երգը շատ հզոր է, սակայն խորհուրդ են տվել ուշադրություն դարձնել նաև որոշ մանրուքների։
«Սևակի առաջին փորձը շատ լավ անցավ։ Նա հոյակապ երգ ունի, ու զգացվում է, որ Սևակը ամբողջ հոգին է դնում այդ կատարման մեջ։ Սակայն, վստահ չեմ, որ այդ երգը հարյուր տոկոսով դուրս կգա եզրափակիչ։ Կան որոշ նրբություններ, որոնց Սևակը լավ կաներ ուշադրություն դարձներ ու արագ շտկեր։ Երգը հզոր էներգետիկա ունի, բայց արդյո՞ք այն կհասնի լսարանին։ Դա է հարցը։ Սևակը շատ լավ պահվածք ունի բեմին, նա շքեղ ձայն ունի, բայց դա բավարար չէ, նա պետք է երգը ներկայացնի դահլիճին այնպես, որ ստիպի կարեկցել իրեն։ Թե ինչպես նա դա կանի՝ չգիտենք, հենց այդ պատճառով էլ նրա անցումը եզրափակիչ՝ հարցականի տակ է», - նշել են հաղորդավարները։
Ի դեպ, հիշեցնենք, որ Սևակն առաջին կիսաեզրափաիկչում ելույթ է ունենալու մայիսի 8-ին՝ 16-րդ համարի ներքո։ Իսկ երկրորդ կիսաեզրափակիչը կկայանա մայիսի 10-ին, եզրափակիչն էլ՝ 12-ին ։