«Լավագույն բանը գրկախառնությունն է». այսօր ծնվել է Օդրի Հեփբերնը

14:35   4 մայիսի, 2018

1950-ականների գեղեցկության խորհրդանիշը՝ դերասանուհի Օդրի Հեփբերնը, այսօր` մայիսի 4-ին, կդառնար 89 տարեկան:

«Նախաճաշ Թիֆանիի մոտ», «Հռոմեական արձակուրդներ», «Սաբրինա», «Իմ չքնաղ լեդին», «Ինչպես գողանալ միլիոնը»` սրանք ֆիլմեր են, որոնք մինչ օրս սիրված են տարբեր սերունդների ներկայացուցիչների կողմից, եւ որոնց գլխավոր դերերում հանդես է եկել գեղեցկադեմ դերասանուհին:

Հեփբերնը մահացել է 25 տարի առաջ՝ 1993 թ-ին: Նա 64 տարեկան էր…

Օդրի Հեփբերնի հայտնի մեջբերումներից մի քանիսը ներկայացնում ենք ձեր ուշադրությանը.

«Որպեսզի աչքերդ լինեն գեղեցիկ, ուրիշների մեջ տես գեղեցիկը, որպեսզի շուրթերդ լինեն գեղեցիկ, միայն լավ խոսքեր ասա, իսկ գեղեցիկ քայլվածքի համար քայլիր այնպես, ասես դու մենակ չես»:

«Կնոջ գեղեցկությունը պետք է տեսնել նրա աչքերում, քանի որ դա է միակ դուռը դեպի նրա հոգին, որտեղ սերն է ապրում»:

«Երբ մեծանում ես, հայտնաբերում ես, որ քեզ տրված է  երկու ձեռք. մեկը, որպեսզի օգնես քեզ, իսկ մյուսով՝ մարդկանց»:

«Ամենակարեւոր բանը կյանքից հաճույք ստանալն ու երջանիկ լինելն է»:

«Եկեք խոստովանենք՝ համեղ շոկոլադե տորթը շատ հարցեր է լուծում: Համենայն դեպս, իմ դեպքում այդպես է»:

«Ջուրը կյանք է, մաքուր ջուրը՝ առողջություն»:

«Կնոջ գեղեցկությունը նրա զգեստների, կառուցվածքի կամ սանրվածքի մեջ չէ»:

«Ես սիրում եմ մնալ ինքս ինձ հետ, շներիս հետ զբոսնել դրսում, նայել ծառերին, ծաղիկներին ու երկնքին»:

«Լավագույն բանը գրկախառնությունն է»:

«Ես հաջողակ եմ եղել: Հնարավորությունները միշտ չէ, որ կողքովդ անցնում են, այնպես որ, եթե հանդիպում ես նրանց, պետք է բռնես ու բաց չթողնես»:



© NEWS.am STYLE