Մի հուզիչ լուսանկարի պատմություն․ ինչպես փեսացուն արտասվեց՝ սիրելիին հարսի զգեստով տեսնելիս

Մելբուրնից մի փեսացու հուզել է սոցիալական ցանցերի օգտատերերին, երբ նրա լուսանկարը հայտնվել է համացանցում։ Բանն այն է, որ Թայրոն Արմիտաժը չի կարողացել զսպել արցունքներն այն պահին, երբ 11 տարվա իր սիրելիին՝ Քելիին, առաջին անգամ տեսել է հարսանեկան զգեստով։

Նա հետագայում պատմել է, որ այդ պահին իր էմոցիաները խառն են եղել, քանի որ հարսանիքից ընդամենը մեկ շաբաթ առաջ հայտնաբերել էր, որ հայրն առողջական լուրջ խնդիրներ ունի։

Երբ լուսանկարիչ Ջեյմս Դեյը նրան հարցրել է, թե ինչու է այդքան հուզվել, Թայրոնը պատասխանել է․

«Այդ պահին ես միայն մտածում էի՝ Աստված իմ, որքան շռայլ է կյանքը, որ ինձ պարգեւել է նրան։ Չէի հավատում, որ այսուհետ մինչեւ կյանքիս վերջ ապրելու եմ նրա կողքին»։

Սակայն փեսացուն թախիծով է խոսում հարսանիքից մեկ շաբաթ առաջ ստացած վատ նորության մասին։

«Ես հեռախոսազանգ ստացա մեծ քրոջիցս, նրա ձայնից միանգամից հասկացա, որ հիմա վատ լուր եմ լսելու եւ կանխազգացի, որ դա կարող էր հայրիկիս առողջության հետ կապված լինել։ Նա 16 տարի է՝ պայքարում է քաղցկեղի դեմ։ Բժիշկներն ասել էին, որ նրա վիճակը վատանում է։ Այդ նորությունը լսելուց հետո ես ուզում էի մոռանալ իմ հարսանեկան պատրաստությունների մասին, բայց հայրս բժիշկներին ասել էր՝ արեք ամեն ինչ, որպեսզի ես կարողանամ մասնակցել որդուս հարսաիքին․․․»։

Փեսացուն նաեւ նշեց՝ չնայած օրը լի էր շատ էմոցիոնալ պահերով, նա իր հիշողության մեջ հավերժ կպահի հատկապես հոր հետ ունեցած խոսկցությունը։

«Չգիտեմ, թե ապագան ինչ է պատրաստել հորս համար, բայց համոզված եմ՝ Քելիի հետ միասին մենք կկարողանանք հաղթահարել ամեն ինչ»։

Աղբյուրը՝ Daily Mail

Լուսանկարները՝ James Day Photography