Այսօր՝ մայիսի 14-ին, ծննդյան 34-ամյակն է նշում աշխարհի ամենահայտնի ձեռներեցներից մեկը՝ Facebook սոցիալական ցանցի համահիմնադիր Մարկ Ցուկերբերգը:
Ցուկերբերգն աշխարհի ամենահայտնի սոցիալական ցանցի ստեղծմանը ձեռնամուխ է եղել 2004 թ-ին, երբ սովորում էր Հարվարդի համալսարանում: Նա կայքը հեղինակել է իր գործընկերների՝ Էդուարդո Սավերինի, Էնդրյու ՄքՔոլումի, Դասթին Մոսկովիչի եւ Քրիս Հյուգսի հետ միասին:
2012 թ-ին Facebook-ն արդեն ուներ մեկ միլիարդ օգտատեր:
2010 թ-ից սկսած Ցուկերբերգն իր ուրույն տեղն է ունեցել Times ամսագրի՝ աշխարհի ամենահարուստ մարդկանց ցուցակում, իսկ 2016 թ-ին Forbes ամսագրի ամենաազդեցիկ մարդկանց ցուցակում Facebook-ի համահիմնադիրը զբաղեցրել է 10-րդ հորիզոնականը:
Ձեր ուշադրությանն ենք ներկայացնում Մարկ Ցուկերբերգի ամենահայտնի մեջբերումներից մի քանիսը:
«Աշխարհի ամենառիսկային բանը ռիսկի չդիմելն է»:
«Facebook-ն ի սկզբանե միտում չուներ դառնալ ընկերություն: Այն ստեղծվել է սոցիալական առաքելություն իրականացնելու եւ մարդկանց միմյանց հետ կապելու համար»:
«Հիմա, երբ կան սոցիալական ցանցեր եւ այլ վիրտուալ գործիքներ, մարդիկ կարող են ցույց տալ, որ իրենք մտածում են եւ որ իրենց ձայնը կարող է լսելի դառնալ»:
«Կապի մեջ լինելը մարդու իրավունքն է»:
«Ես ամենից շատ հետաքրքրված եմ իրականացնել աշխարհը բոլորի համար բաց անելու իմ առաքելությունը»:
«Շարժվիր առաջ եւ կոտրիր կարծրատիպերը»:
«Ես միայն ուտում եմ այն կենդանիների միսը, որոնց ինքս եմ որսում»:
«Facebook-ը տարբերվում է Apple-ից, Google-ից, Amazon-ից, Samsung-ից ու Microsoft-ից: Մենք փորձում ենք ստեղծել համայնք»:
«Մարդիկ սկսել են ոչ միայն ազատորեն կիսվել տեղեկությամբ, այլեւ ավելի բաց լինել մյուս մարդկանց հետ շփման մեջ»:
«Facebook-ը մարդկանց մոտիվացնում է ստեղծել մի այնպիսի արժեքավոր բան, որով հետո հպարտությամբ կկիսվեն ընկերների հետ»:
Լուսանկարները՝ Մարկ Ցուկերբերգի Facebook-ի էջից