«Ամեն մի նկար մի օրվա պատմություն է, որն ունի իր կյանքը»,-ասում է գեղանկարիչ Դավիթ Դանիելյանը, որն այսօր՝ մայսի 21-ին, ՄԱԿ-ի հայաստանյան գրասենյակում ներկայացրեց իր կտավներից 19-ը, որոնք արտահայտում են տարբեր իրավիճակներ ու էմոցիաներ:
Գեղանկարչի ցուցահանդեսը կայացավ ՄԱԿ-ի հայաստանյան գրասենյակի ու Պարենի համաշխարհային ծրագրի ջանքերով: Այն նվիրված է մայիսի 21-ին նշվող՝ Հանուն երկխոսության եւ զարգացման մշակութային բազմազանության համաշխարհային օրվան:
«Քանի որ սրահը շատ մեծ չէ, ցուցադրել ենք 19 կտավ: Դրանք բոլորն իմ հոգու գույներն են, իմ զգացողություններն են, որոնք տվյալ պահի էմոցիաներ են: Աբստրակտ նկարչությունն այդպիսին է՝ երեւակայություն: Նկարներն ավելի շատ երեխաներ են ինձ համար, քան կտավներ: Եթե իմ կտավները դիտողներին որեւէ դրական էներգիա փոխանցեն, ես ինձ երջանիկ կզգամ»,-ասում է նկարիչը, որը մտադիր է աշխատանքները ցուցադրել նաեւ Հայաստանից դուրս:
«Ծրագրում կան մի քանի ցուցահանդեսներ: Սեպտեմբերին երկու ցուցահանդես կլինի, մեկը՝ Լյուքսենբուրգում, մյուսը՝ Ֆրանսիայի Լիր քաղաքում: Հունիսին եւս կփորձեմ մասնակցել եվրոպական ցուցահանդեսների»:
Դավիթի անհատական ցուցահանդեսին ներկա էին ինչպես արվեստի սիրահարներ, այնպես էլ մշակույթի գործիչներ, նրանց թվում էին դերասան, հումորիստ Մկրտիչ Արզումանյանն ու դերասանուհի-հաղորդավարուհի Անուշիկ Առաքելյանը:
Ցուցահանդեսը կտեւի մինչեւ մայիսի 31-ը:
Ինչ վերաբերում է երիտասարդ նկարչին՝ նա ծնվել է Կապանում՝ արվեստագետի ընտանիքում: 2015թ-ին ավարտել է Գեղարվեստի ազգային ակադեմիան: 2004-2008թթ. մասնակցել է մի շարք ցուցահանդեսների Հնդկաստանում, Լեհաստանում եւ Ղրղզստանում, որտեղ արժանացել է հատուկ մրցանակի:
Սյունե Առաքելյան