Loft ինքնազարգացման ու ժամանցի կենտրոնն ու Առաջին ալիքի «Եթե բոլորը» բարեգործական հիմնադրամը երեկ՝ հունիսի 3-ին, բարեգործական համերգ էին կազմակերպել 4.5 ամսական Մայքլին օգնելու համար: Երեխան գալենի երակի անեւրիզմա ունի եւ պետք է հրատապ վիրահատության ենթարկվի Ռուսաստանում: Վիրահատությունն արժե մոտ 7 միլիոն դրամ:
Փոքրիկ Մայքլին օգնելու համար երեկ տեղի ունեցած բարեգործական համերգին ելույթ ունեցան Սրբուհի Սարգսյանը, Վիգեն Հովսեփյանն ու Սոնա Ռուբենյանը. համերգը վարեցին «Եթե բոլորը» ծրագրի հաղորդավարներ Վահե Խանամիրյանն ու Լիլիթ Մուրադյանը:
Երգիչները հավաքվածների եւ հյուրերի համար երգեցին իրենց ամենահիթային ստեղծագործոթյուններն ու սիրված cover-ները, իսկ միջոցառման մասնակիցներն իրենց ներդրումներն արեցին հանգանակությունների համար նախատեսված արկղներում:
«Եթե բոլորը» հաղորդման առաջիկա թողարկման ընթացքում խոսվելու է Մայքլի ու նրան օգնելու ճանապարհների մասին:
Կազմակերպիչների խոսքով՝ նմանատիպ բարեգործական միջոցառումները շարունակական բնույթ են կրելու:
NEWS.am STYLE-ը եւս ներկա էր բարեգործական համերգին: Մանրամասներին հետեւեք մեր տեսանյութերի եւ ֆոտոռեպորտաժի միջոցով:
Սյունե Առաքելյան