«Իմ էմոցիաներից շատ քիչ բան կա դրա մեջ». Նիկ Էգիբյանը՝ նոր տեսահոլովակի, «բուռն» համագործակցությունների եւ ամառային հանգստի մասին

15:03   28 հունիսի, 2018

Ինչպես արդեն տեղեկացրել ենք՝ երգիչ եւ երաժիշտ Նիկ Էգիբյանն օրերս ներկայացել է նոր տեսահոլովակով: NEWS.am STYLE-ն իր ընթերցողների հետ արդեն կիսվել է երգչի «Հոգուս արեւ» երգի տեսահոլովակով, իսկ այսօր Նիկի հետ զրուցել ենք իր նոր աշխատանքի, հայկական շոու-բիզնեսի հայտնիների հետ համագործակցության եւ ամառային հանգստի ծրագրերի մասին:

«Տեսահոլովակի համար ընտրեցի այս երգը, քանի որ այն ամենակոմերցիոնն էր «Խելագարված»-ից հետո, որն արդեն ուներ տեսահոլովակ: Բացի այդ՝ երգը հայերեն է, մեղեդին հայկական կոմերցիոն ելեւէջներով էր հյուսված եւ մտածեցի՝ գեղեցիկ տեսահոլովակ ունենալու դեպքում այն կսիրվի»,-զրույցի սկզբում նշեց Նիկը՝ հավելելով, որ երգն սկզբնական փուլում այլ հասցեատեր ուներ.

«Երգն իրականում գրել էի Սարո Թովմասյանին առաջարկելու համար, իմ էմոցիաներից շատ քիչ բան կա դրա մեջ: Ուղղակի, այն շատ սիրեցի ու որոշեցի ինքս կատարել:)»:

«Հոգուս արեւ» երգի տեսահոլովակը նկարահանել է օպերատոր Սուրեն Թադեւոսյանը, սակայն մի շարք տեսահոլովակների ռեժիսոր Նիկն, իհարկե, անմասն չի մնացել սեփական տեսահոլովակի սեցնարային աշխատանքներից.

«Կարելի է ասել՝ ռեժիսորը ես եմ, օպերատորը՝ Սուրենը: Միտքն իմն է եղել, դե 100-ից ավել տեսահոլովակ նկարահանելուց հետո շատ մեծ փորձ ունեի արդեն, գիտեի՝ ինչ եմ անելու, ինչպես եւ որտեղ: Նկարահանումը տեւել է 6 ժամ»:

Ինչ վերաբերում է հայկական շոու-բիզնեսի մյուս ներկայացուցիչների հետ նոր համագործակցություններին՝ ինչպես Նիկն է նշում՝ «բուռն» շրջան է սպասվում.

«Առաջիկայում կրկին Սոֆիի, Գայա Արզումանյանի, Մգեր Արմենիայի, Մագա Հովհաննիսյանի համար եմ երգեր պատրաստում, «Դեպի Մանկական Եվրատեսիլ» նախագծի  5 մասնակցի երգ ես եմ գրել եւ գործիքավորել, շուտով կլսեք դրանք, նաեւ Մավր Մկտչյանի համար ունեմ երգ, Վիգեն Հովսեփյանի հետ ենք պատրաստվում համագործակցել, նաեւ Սարոյի հետ համատեղ նախագիծ ունենք, մի խոսքով՝ ինչպես միշտ բուռն շրջան է»:

Եվ չնայած ծանրաբեռնված գրաֆիկին՝ երաժիշտը չի մոռանում նաեւ ամառային հանգստի մասին.

«Այս տարվա ապրիլին եմ մեկնել հանգստի՝ Բարսելոնա, ամռանը 8 ընկերներով 5 օրով կմեկնենք Վրաստան, իսկ սեպտեմբերին կմեկնեմ Գերմանիա՝ քրոջս մոտ՝ շոփինգի նպատակով:)»,-նշեց նա:

Սյունե Առաքելյան

Լուսանկարները՝ Նիկ Էգիբյանի Facebook-ի էջից



© NEWS.am STYLE