Երեւանում տեղի ունեցավ Դուեյն Դոպսիի եւ Hellraisers ամերիկյան խմբի շքեղ համերգը (ֆոտո/վիդեո)
23:10 4 հուլիսի, 2018Գաֆէսճեան արվեստի կենտրոնում տեղի ունեցավ Գրեմմի երաժշտական մրցանակի նոմինանտ Դուեյն Դոպսիի հրաշալի համերգը: Hellraisers ամերիկյան խմբի հետ նրանք միանգամից գրավեցին ունկնդիրներին:
Ամերիկացիները, միանշանակ, գիտեն, թե ինչպես է պետք իրական շոու ստեղծել:
Դուեյնի խումբը Հայաստան էր ժամանել ամերիկյան դեսպանատան հրավերով, ու այսօր՝ ԱՄՆ Անկախության տոնին, նրանք ելույթ ունեցան Կասկադում:
Ելույթով հանդես եկավ ԱՄՆ դեսպան Ռիչարդ Միլսը, ով խոստացավ, որ հենց խումբը սկսի ելույթը բոլորը սկսելու են պարել, եւ նա, իսկապես, չսխալվեց: 
Խումբը ներկայացնում է երաժշտություն, որը շատ տարածված է Լուիզիանա նահանգում: Երաժշտական այդ ուղղությունը, որը անվանում են «զայդեկո», սկիզբ է առել XX դարի սկզբին Լուիզիանայի հարավ-արեւմտյան շրջաններում:
Այդ ոճն առաջացել է ֆրանսիական ազգային երաժշտության, աֆրիկյան ռիթմերի ու կարիբյան հնչյունների միաձուլումից: 
Պարույր Սինյավսկի