Այս ամառ նորաձեւության աշխարհն, իսկապես, շատ զարմացրեց. 90-ականների գրկից վերադարձան նեղ շրջանակներով արեւային ակնոցները, վինտաժ իրերը, գոտկատեղին ամրացվող պայուսակները:
2018 թվականի գարուն-ամառվա գույնը կարելի է համարձակորոն համարել դեղինը, որը ջերմացրեց ինչպես համաշխարհային աստղերի, այնպես էլ ոճային իգական սեռի ներկայացուցիչների սրտերը, ովքեր մշտապես ցուցամատը պահում են նորաձեւության զարկերակին:
Դեղինի երանգները փայլեցին հանրաճանաչ աստղերի հագին, ու դրանք դարձան պայծառ տրամադրություն հաղորդող վառ պատառիկներ:
Դեղինի նուրբ երանգով վերջերս հանրությանը ներկայացած Մելանիա Թրամփին՝ ԱՄՆ առաջին տիկնոջը, շատերը համեմատեցին հեքիաթային արքայադստեր հետ:
Արքայազն Հարրիի ու Մեգան Մարքլի հարսանիքի ընթացքում հյուրերի մեջ առանձնահատուկ փայլով էր շողում հոլիվուդյան դերասան Ջորջ Քլունիի կինը՝ Ամալ Քլունին, որը եւս ընտրել էր «կախարդական» գույնը:
Նրա այս հանդերձանքը էլեգանտության ու սեթեւեթանքի հրաշալի համադրություն է:
Կարծես Ամալի հանդերձանքով ոգեշնչված՝ վերջերս դեղինին նախապատվություն տվեց նաեւ Սասսեքսի դքսուհին՝ Մեգան Մարքլը:
Աշխարհի ամենապահանջված մոդելները, իհարկե, չէին կարող բաց թողնել այս թրենդը:
Իրինա Շեյքը փայլեց սեւ եւ դեղին գույների համադրությամբ թեթեւ զգեստով, իսկ հետո ներկայացավ նուրբ երանգի դեղին, կարմիր գորգին համահունչ, երկարափեշ հանդերձանքով:
Իսկ Էմիլի Ռատաժկովսկին օրերս ընտրել էր դեղինի նուրբ ու պաստելային երանգ, որով բավականին գայթակղիչ տեսք ուներ:
Բրիթնի Սփիրսը, որը վերջերս ակտիվորեն մասնակցում է նորաձեւություն կերտելու գործընթացին, ցույց էր տվել իրեն համապատասխան իդեալական գույնը: Դե, գուշակեք, թե որ գույնի մասին է խոսքը:
20-ամյա աստղ Քայլի Ջենները Փարիզի նորաձեւության շաբաթվա շրջանակներում հանդես էր եկել դեղին հանդերձանքով, որը, ճիշտ է, ավելի շատ հիշեցրել է «Ամբողջ ծանրությամբ» (Breaking Bad) սերիալի գլխվոր հերոսի համազգեստը:
Անցում կատարելով դեպի բիկինիներ՝ ներկայացնենք երկու վառ օրինակ, թե ինչպես է դեղինը ընդգծում մարմնի առեւայրուքը:
Առաջինը սուպերմոդել Քենդալ Ջեններն է՝ Քայլիի ավագ քույրը, որի տեսքը այս լողազգեստով այնքան շլացնող է, որ նա անգամ անհրաժեշտ չի համարել ցույց տալ դեմքը:
Իսկ հաջորդը երգչուհի Ռիտա Օրան է՝ իր գայթակղիչ կերպարով: Երգչուհին իր գունեղ ու պայծառ կերպարը ստացել է ամառային ուրախ գույնի՝ դեղինի միջոցով:
Պետք է նշել, որ Երեւանի փողոցներում եւս վերջին ժամանակահատվածում աճել է դեղինը գերադասողների թիվը: Ի դեպ, վառ գույներին սկսել են նախապատվություն տալ նաեւ տղաները: Սա, հավանաբար, ֆանտաստիկ ու անհավանական կթվար մի քանի տարի առաջ, իսկ այսօր իրականություն է:
Եվ ի վերջո, եթե անգամ Մեծ Բրիտանիայի թագուհին է նախընտրում վառ դեղինը, ապա մեր տղաները տարակուսելու պատճառ չունեն: Համարձակորեն ընտրեք դեղինը:
Լուսանկարները՝ Getty, shuterstock, Instagram
Սյուզի Մսրյան