«Ես վախենում էի կանանցից». Անտոնիո Բանդերասը դարձավ 58 տարեկան (ֆոտո/վիդեո)
17:05 10 օգոստոսի, 2018Իսպանական ծագում ունեցող հոլիվուդյան հայտնի դերասան Անտոնիո Բանդերասն այսօր՝ օգոստոսի 10-ին, նշում է ծննդյան 58-ամյակը: Նա իր դերասանական կարիերան սկսել է Պեդրո Ալմոդավարի հետ համագործակցությունից, որից հետո հայտնվել է հոլիվուդյան հայտնի նախագծերում՝ «Մարդասպանները», «Հարցազրույց վամպիրի հետ», «Հուսահատը», «Լրտեսների երեխաները», սակայն իսպանացի մաչոյին հատկապես մեծ փառք բերեց «Զորրոյի դիմակը» ֆիլմը, որտեղ նա մարմնավորում էր Ալեխանդրոյին: Ֆիլմում նրա խաղընկերուհին գեղեցկուհի Քեթրին Զետա Ջոնսն էր: Թեեւ կինոնկարում Բանդերասը դիմակ էր կրում, որպեսզի իրեն չճանաչեն, այսօր հմայիչ դերասանն իր հանրահայտ դեմքը չի կարող այլեւս թաքցնել ոչ մի դիմակի ետեւում:
Իսկ նրան առավել ցայտուն բացահայտելու նպատակով առաջարկում ենք ընթերցել նրա տարբեր մտքերից մի քանիսը:
«Ակնկալիքը վրդովմունքի մայրն է»:
«Երբ մեծանում ես, շուրջդ ամեն ինչ փոխվում է՝ միտքդ, մարմինդ, աշխարհընկալումդ»:
«Երբեմն առավոտյան ես կնճիռներ եմ ունենում, կախված է, թե ինչպիսին է եղել գիշերը: Բայց ես ընդունում եմ ինձ եւ իմ տարիքը: Իմ աչքերի տակ ես պարկեր ունեմ: Շատ մարդիկ խորհուրդ են տվել դրանք հեռացնել, սակայն ես հրաժարվել եմ»:
«Ամեն առավոտ արթնանում եմ՝ ինքս ինձ հարցնելով՝ արդյոք ես սեքս խորհրդանի՞շ եմ: Հետո գնում եմ նորից պառկելու: Կարծում եմ՝ նման կերպ մտածելն անմտություն է»:
«Կերպարը ոչ ոքին չի պատկանում, նույնիսկ, այն դերասանին, որը նրան մարմնավորում է»:
«Ինչ-որ բան է կատարվում աշխարհում, որը նախկինում չի եղել: Մենք բոլորս դարձել ենք մի մեծ ուղեղ»:
«Ես վախենում էի կանանցից: Երբ երիտասարդ էի, նրանք ինձ սարսափեցնում էին: Բայց կնոջ էությունը բացահայտելը հրաշալի երեւույթ է: Դու երբեք չես դադարում սովորել նրանց մասին»:
«Ամեն առավոտ ես զբաղվում եմ յոգայով, հետո կես ժամ վազում եմ ու գնում սաունա»:
«Երբ դու տարբեր լեզուներով ես աշխատում, շատ չես կառչում բառերից»:
«Ես սիրում եմ տարբեր տեղեր գնալ ու նոր բաներ սկսել»:
Լուսանկարները՝ Անտոնիո Բանդերասի Facebook-ի էջից