Լոս Անջելեսի ոստիկանները սպանել են «Շտապ օգնություն» սերիալի աստղին
12:04 1 սեպտեմբերի, 2018Լոս Անջելեսի ոստիկանները «Շտապ օգնություն» սերիալի աստղ Վանեսա Մարկեսին սպանել են իր իսկ տան մեջ: Ինչպես հայտնում է Variety-ն, ոստիկանությունը Փասադենայում գտնվող դերասանուհու տուն է ժամանել դռնապանի զանգից հետո, որը հայտնել է, որ Մարկեսի բնակարանից աղմուկ է լսվում, եւ թե արժի հավաստիանալ, որ կնոջ հետ ամեն ինչ կարգին է:
Կանչով ժամանած ոստիկանները դերասանուհուն 1,5 ժամ ապարդյուն համոզել են հիվանդանոց գնալ: Նա այնուհետեւ ձեռքն է վերցրել օդամղիչ ատրճանակը եւ ուղղել ոստիկանների վրա:
Ոստիկանները ատրճանակը իսկական համարելով՝ կրակել են կնոջ վրա:
Ոստիկանությունից հայտնել են, որ Մարկեսի վրա են կրակել երկու ոստիկաններ, նրա մարմնի մեջ է մխրճվել առնվազն մեկ փամփուշտ: Դերասանուհուն տեղափոխել են հիվանդանոց, որտեղ բժիշկներն արձանագրել են նրա մահը:
Վանեսա Մարկեսը առավել հայտնի է հանրահայտ «Շտապ օգնություն» սերիալում բուժքույր Վենդի Գոլդմանի դերով: Ի դեպ, անցյալ տարի դերասանուհին Ջորջ Քլունիին անհիմն մեղադրել էր, որ նրա ռասայական կողմնակալության պատճառով իրեն սերիալից հանել են: Ջորջ Քլունին բազմիցս հերքել է այս հայտարարությունը՝ նշելով, որ քասթինգի հետ ոչ մի ընդհանուր բան չի ունեցել: