Առաջարկում ենք դիտել. «Մինչ քեզ հանդիպելը»

Էմոցիաներ՝ ծիծաղ, հուզմունք, լաց, խորը հոգեբանություն եւ անձի անհատական ապրումներ. մենք երաշխավորում ենք, որ էմոցիոնալ ցանկացած դրսեւորում կկարողանաք վերապրել, եթե հանկարծ որոշեք դիտել Տեա Շերոքի «Մինչ քեզ հանդիպելը»/Me Before You դրաման, որի գլխավոր դերերում հանդես են գալիս Էմիլիա Քլարքն ու Սեմ Քլաֆլինը:

Ֆիլմը Ուիլի եւ Լուի անսպասելի ծանոթության եւ զգացմունքների մասին է:

Ուիլը երիտասարդ է, որն արդեն մի քանի տարի է՝ ճանապարհային պատահարի պատճառով գամված է անվասայլակին, քանի որ չի կարողանում շարժել ոչ ձեռքները, ոչ ոտքերը:

Լուն երիտասարդ ու կենսախինդ աղջիկ է՝ կիրթ եւ ինքնաբավ, որը, չգիտես՝ ինչու, չի կարողանում գտնել իրեն հարմար աշխատանք, բայց քրոջ ուսման համար գումար է անհրաժեշտ եւ նա պատրաստ է ամեն աշխատանք կատարել՝ ընտանիքին օգնելու համար:

Աշխատանքի որոնումները Լուին տանում են Ուիլի առանձնատուն: Աղջիկը գիտեր, որ ստիպված է լինելու խնամել հաշմանդամություն ունեցող մի մարդու, սակայն նա չէր էլ կարող պատկերացնել, որ իր գործատուն այդքան երիտասարդ է եւ հմայիչ, սակայն ցավոք՝ արդեն կյանքի հարվածների միջով անցած: Չնայած բարդ բնավորությանն ու կամակորությանը՝ Ուիլը մի քանի օրերի ընթացքում կարողանում է գրավել աղջկա սիրտը, իսկ Լուի միակ նպատակն այնուհետեւ դառնում է Ուիլին ճակատագրական որոշումից հետ պահելը: Կկարողանա՞ արդյոք Լուն իր սիրո եւ հոգատարության շնորհիվ համոզել երիտասարդին անկախ դժվարություններից՝ շարունակել ԱՊՐԵԼ, թեկուզ միայն հանուն իրեն…

Ֆիլմն էկրաններ է բարձրացել 2016 թ-ին: Սցենարային առումով այն նման է հնդկական արտադրության «Աղերսանք»/Guzaarish (2010) ֆիլմին, որտեղ եւս շոշափվում է էֆտանազիայի թեման, իսկ գլխավոր հերոսներին հնդկական տարբերակում մարմնավորում են Այշվարիա Ռայն ու Ռիթիկ Ռոշանը:

Կադրերը՝ ֆիլմից