«Եթե դու չես արտասվել, աչքերդ չեն կարող գեղեցիկ լինել». Սոֆի Լորենը նշում է 84-ամյակը
15:35 20 սեպտեմբերի, 2018Այսօր` սեպտեմբերի 20-ին, ծննդյան 84-ամյակն է տոնում լեգենդար դերասանուհի Սոֆի Լորենը:
14 տարեկանում Լորենը կարիերան սկսել է գեղեցկության մրցույթներից, հետո դարձել մոդել, այնուհետեւ՝ դերասանուհի: Նա մի քանի հեղինակավոր կինոփառատոնների մրցանակակիր է, ինչպես նաեւ «Ոսկե գլոբուս»-ի հնգակի մրցանակակիր: Սոֆին նաեւ «Օսկար» է ստացել՝ «հիշարժան դերերով հարուստ կարիերայի համար, որոնք փայլ են հաղորդել կինեմատոգրաֆիային»:
Այսօր ձեր ուշադրությանն ենք ներկայացնում բոլոր ժամանակների ամենագեղեցիկ կանանցից մեկի մտքերից մի քանիսը:
«Գեղեցկությունն այն է, ինչ դու զգում ես ներսից, եւ այն արտացոլվում է աչքերումդ: Դա ֆիզիկական երեւույթ չէ»:
«Դու պետք է հաճույք ստանաս կյանքիցդ, միշտ քեզ շրջապատես այն մարդկանցով, որոնց սիրում ես, որոնց հետ զրույցները քեզ երջանկացնում են: Այնքան շատ դրական բաների մասին կարելի է մտածել»:
«Եթե դու չես արտասվել, աչքերդ չեն կարող գեղեցիկ լինել»:
«Աշխատանքիցդ չես կարող հաճույք ստանալ, եթե չես անում այն, ինչ քեզ դուր է գալիս»:
«Սեքսուալության 50 տոկոսն այն է, ինչ դու ունես, 50 տոկոսն էլ հիմնված է մարդկանց կարծիքի վրա»:
«Ես ծնվելուց երկու առավելություն եմ ունեցել, մեկը իմաստուն ծնվելն էր, մյուսը ծնվելն էր աղքատության մեջ»:
«Ես անդադար զբոսնում եմ: Դա շատ լավ է սրտի համար»:
«Ես բախտավոր եմ, քանի որ շատ գեղեցիկ մայրիկ եմ ունեցել»:
«Ես շատ ամաչկոտ մարդ եմ եւ երբեք չեմ փորձել խաղալ թատրոնում»:
«Ես ընձուխտ եմ: Ես, նույնիսկ, քայլում եմ ընձուխտի նման՝ երկար պարանոցով ու երկար ոտքերով»: