Ֆիթնես, պարեր, վազք ու գունավոր հարսանիք. Երեւանում 4-րդ անգամ անցկացվեց «Գունազարդ վազք» միջոցառումը (ֆոտո/վիդեո)
13:38 30 սեպտեմբերի, 2018Այս առավոտը Երեւանում մեկնարկեց գունավոր տրամադրությամբ, քանի որ այսօր՝ սեպտեմբերի 30-ին, մեր մայրաքաղաքում արդեն 4-րդ տարին անցկացվեց «Երեւանյան գունազարդ վազք» միջոցառումը:
Այս տարի միջոցառումը բացառիկ էր նրանով, որ մասնակիցների թվում էին նաեւ մտավոր եւ ֆիզիկական սահմանափակ ունակություններով անձիք: Այս տարվա վազքը նվիրված էր Երեւանի 2800-ամյակին, այդ պատճառով էլ վազքուղին կազմում էր 2800 մ: Ինչպես նախորդ տարիներին, այս անգամ եւս գունազարդ վազքին նախորդեց ֆիթնես նախավարժանք, այնուհետեւ մասնակիցների տրամադրությունն ավելի թեժացրեց ամբողջ ընթացքում հնչող բարձր երաժշտությունը:
Run Armenia նախագծի հիմնադիր-նախագահ Ղազար Հակոբյանի խոսքով՝ ի սկզբանե վազքի նպատակն է եղել Հայաստանում զարգացնել մասսայական սպորտն ու սպորտային տուրիզմը՝ նպաստելով նաեւ մարդկանց առողջ ապրելակերպին ու զբաղվելով բարեգործությամբ:
Այս տարվա վազքին միացել էր նաեւ Family Network ընկերությունը, որի համահիմնադիր եւ գլխավոր տնօրեն Գեւորգ Ենգիբարյանը NEWS.am STYLE-ի հետ զրույցում նշեց, որ մի քանի շարժառիթներ կային Yerevan Color Run-ին միանալու, որոնցից են, օրինակ, այսօրվա «թվայնացված սերնդին»-ին դեպի շփում, բակային խաղեր, սպորտ բերելն ու բազմաթիվ ընտանիքներ միավորելը:
«Մեր ընկերությունը՝ Family Network-ը, որը Հայաստանում մալուխային հեռուստատեսության և ինտերնետի առաջատար մատակարարներից է, այս միջոցառմանն է հրավիրել իր բաժանորդների, ընկերների ընտանիքներին, և ես վստահ եմ, որ YEREVAN COLOR RUN–ի շնորհիվ նրանք միասին ավելի ուրախ, գունեղ և հետաքրքիր ժամանակ կանցկացնեն և էլ ավելի կամրապնդեն իրենց ընտանեկան, ընկերական, բարեկամական կապերը: Մենք սիրով միացել ենք Գունազարդ վազք միջոցառմանը, քանզի այն նաև բարեգործական ուղղություն ունի: Եվ ամենակարևոր շարժառիթներից մեկը. մեր ընկերությունը թե՛ իր բրենդային գույներով, թե՛ իր տրամադրությամբ, և թե՛ իր աշխատակազմով ոչ պակաս գունազարդ է: Եվ մենք այսօր այստեղ ենք՝ էլ ավելի գունավորելու ընտանիքի բոլոր անդամների համար հետաքրքիր ժամանցին նվիված միջոցառումը, մարդկանց կյանքը լցնելու դրական և երջանիկ զգացողություններով»:
Ի դեպ, այս տարվա միջոցառման ընթացքում գրանցվեց նաեւ հետաքրքիր դեպք. նորապսակ մի զույգ իր հարսանիքը որոշեց անցկացնել Շահումյանի հրապարակում՝ մասնակիցը դառնալով գունավոր տոնին ու գունազարդվելով:)
Ինչպես ամեն տարի՝ այս անգամ եւս վազքի առաջին երկրորդ եւ երրորդ հորիզոննականները գրաված տղաներն ու աղջիներն արժանացան Yerevan Color Run-ի հովանավորների կողմից պարգեւների:
Միջոցառման բոլոր մանրամասները ֆիքսել է NEWS.am STYLE-ը:)
Սյունե Առաքելյան
Լուսանկարները՝ Արսեն Սարգսյանի