Սերգեյն ու Նարեկը ամփոփեցին տարվա ամենաքննարկված թեմաները «Մեծ, չաղ, հայկական STAND UP» շոուով (ֆոտո/վիդեո)
11:12 18 նոյեմբերի, 2018Քաղաքական իրավիճակի հումորային վերլուծություններ եւ սեփական կյանքից զավեշտալի դեպքեր՝ ArmComedy-ի հաղորդավարներ Սերգեյ Սարգսյանն ու Նարեկ Մարգարյանը երեկ՝ նոյեմբերի 17-ին, երեւանյան հանդիսատեսին ներկայացան «Մեծ, չաղ, հայկական SAND UP» շոուով:
Սերգեյն ու Նարեկը բեմում ներկայացան ե´ւ առանձին համարներով, ե´ւ համատեղ ելույթով: Նրանց աչքից չէր վրիպել քաղաքական ոչ մի անցուդարձ, նրանց պատմություններում հայտնվել էին ներկայիս քաղաքական ոլորտի ամենաքննարկվող դեմքերը, սակայն հանդիսատեսի մոտ առանձնահատուկ ծիծաղ առաջացրեցին նաեւ տղաների սեփական կյանքից դրվագները:
Շոուից հետո սիրված հաղորդավարները (թեեւ միայն Սերգեյն է իրեն այդպես անվանում, բայց եկեք չբացառենք նաեւ Նարեկին:)), տպավորություններով կիսվեցին լրագրողների հետ՝ հայտնելով, որ գոհ են հանդիսատեսի արձագանքից:
Մինչ երեւանյան շոուն Սերգեյն ու Նարեկը ելույթներ ունեցել են նաեւ Գյումրիում եւ Վանաձորում:
«Ամեն քաղաքում փորձում ենք մտցնել տեղային կոլորիտ: Գյումրիում, օրինակ, այնտեղին վերաբերող քաղաքական կատակներ էին, նույնն էլ՝ Վանաձորում: Երեւանում ավելի բազմազան էին խորացումները քաղաքական իրավիճակի վրա եւ մենք շատ գոհ ենք եւ երջանիկ, որ մարդիկ ծիծաղում էին»,-նշեց Սերգեյը, Նարեկն էլ հավելեց՝ շոուն շարունակական բնույթ կկրի եւ կներկայացվի նաեւ Հայաստանի այլ մարզերում, նաեւ դրսում՝ Գլենդելում, Տորոնտոյում եւ Մոսկվայում. համենայն դեպս՝ իրենք նման ցանկություն ունեն.
«Տարին շատ հագեցած էր, մենք էլ փորձեցինք ամփոփել այն, մեր տեսլականը ցույց տալ:Քանի որ ե´ւ Գյումրիում էինք ելույթ ունեցել, ե´ւ Վանաձորում, հասցրել էինք հասկանալ՝ որ կատակներն են ավելի շատ ծիծաղ առաջացնում, այնպես որ՝ այստեղ ամեն ինչ իդեալական էր»,-ավելացրեց նա:
NEWS.am STYLE-ը ներկայացնում է stand up շոուից փոքրիկ հատված եւ ֆոտոռեպորտաժ:
Սյունե Առաքելյան