Հայկական հոգին՝ շքեղ կերպարներում․ Կիեւում տեղի է ունեցել Հայկ Ավանեսյանի նոր հավաքածուի շնորհանդեսը
14:20 22 նոյեմբերի, 2018NEWS.am STYLE-ը շարունակում է գրել Ուկրաինայում ապրող տաղանդավոր, հայ դիզայներ՝ Հայկ Ավանեսյանի մասին, որը երեկ՝ Ուկրաինայի մայրաքաղաքում ներկայացրել է «Չորս եղանակ» հավաքածուն։
«Երբ Հայաստանում էի, շատ էի քայլում, նայում։ Հաճախում էի վայրեր, որտեղ գորգ էին գործում եւ վաճառում դրանք։ Նայում էի, ոգեշնչվում եւ հետաքրքրվում էի։ Շատ զարդաքանդալներ կային շենքերի վրա, գեղեցիկ զարդաքանդակներ եմ հանդիպել Հանրապետության հրապարակում։
Ուսումնասիրել եմ եկեղեցիների պատերը, ծատ գեղեցիկ նախշեր եւ որմնանկարներ։ Եվ նվեր եմ ստացել երկու գիրք, մեկը հայկական որմնանկարների մասին, մյուսը՝ հայկական տառերի հետաքրքիր մատուցում։
Մենք շատ ենք օգտագործում ասեղնագործությունը։ Մտածում եւ վերամշակում ենք բազմաթիվ նկարներ եւ նախշեր։ Այս տարի ես ցանկացա, որպեսզի դա լինի մերը։ Ցանկանում եմ, որպեսզի մեր հաճախորդներն ու աստղերը կրեն հայկական զարդանախշերով զգեստներ։
Սակայն ցանկանում եմ նշել, որ ազգային հագուստ չի լինելու։ Հավաքուն ներառում է իրեր, որոնք ունեն հայկական զարդանախշերից վերցված դետալներ։ Ինչ-որ տեղ փոխել ենք գույնը, ինչ-որ տեղ՝ ձեւը, ինչ-որ բան ավելացրել կամ հանել ենք։ Սա լինելու է ժամանակակից մատուցում, այն է՝ իմ ոճով, - ավելի վաղ հայտարարել էր Հայկը՝ մեզ հետ զրույցի ժամանակ։
Դիզայները, որը միշտ իր ստեղծագործություններում հատուկ նշանակություն ու տեղ է հատկացնում ձեռքի աշխատանքին՝ գործվածքին։ Այս անգամ նա ոգեշնչվել է հայկական գորգերի տարբեր նախշերից, պատկերներից, դետալներից, ինչպես նաեւ ճարտարապետական քանդակներից։
Երաժշտական մթնոլորտն ապահովել է Ուկրաինայի ամենահայտնի դիջեյներից մեկը՝ DJ Light-ը։
Ցուցադրություն բացել է «Միսս Ուկրաինա-Աշխարհ»՝ Կարինա Ժոսանը։
Հյուրերի ցանկում եղել են՝ Նիկոլայ Տիշենկոն, Ալլա Բարանովսկայան, MARUV-ը, Աննա Դոբրիդնեւան, Alyosha-ն, Տարաս Տոպոլյան, Օլգա Ջարտին, Կատերինա Օսադչայան, «Միսս Ուրաինա 2016» Ալեքսանդրա Կուչեչենկոն, «Միսս Ուրաինա 2017» Պոլինա Տկաչը, մարզիչ Պաուլու Ֆոնսեկան, ֆուտբոլիստ Դանիլո Նեվեսը եւ շատ այլ հայտնիներ։
Դիզայների մամուլի ծառայություն
Պարույր Սինյավսկի