«2019-ին երազում եմ լինել ավելի երջանիկ». Աստղիկ Սաֆարյանի տոնական ֆոտոշարքն ու ամանորյա բլիցը

Աստղիկ Սաֆարյանն այս տարի աչքի ընկավ ոչ միայն նոր երաժշտական գործերով, այլեւ միմյանցից տարբերվող եւ բազմազան ֆոտոշարքերով: Լուսանկարվել սիրող երգչուհին, բնականաբար, չէր կարող անտարբեր անցնել Ամանորի կողքով: Աստղիկը տոնական նոր ֆոտոշարք է իրականացրել, որն առաջինը տրամադրել է NEWS.am STYLE-ին: Երգչուհին չի մոռացել պատասխանել նաեւ մեր տոնական բլից հարցմանը՝ շարունակելով մեր առաջարկած նախադասությունները:

Երբ փոքր էի, ամեն Ամանորին…Առավոտյան անհամբեր ստուգում էի արդյոք բարձիս տակ կա դրված նվեր, եթե չէր լինում, ապա վազում էի դեպի տոնածառ, եւ գտնում նվերս տոնածառի տակ։

Հասկացա, որ Ձմեռ պապ գոյություն չունի, երբ… Երբ մի գեղեցիկ օր ամանորյա նվեր ստացա եւ վրան գրված էր «Ձմեռ ՊԱՊԱ-ից» ..(ծիծաղում է):

Ամանորի ամենասպասված նվերս…Երջանկություն:

Վերջին անգամ ձնեմարդ պատրաստել եմ…Վերջին անգամ Առաջին անգամ եմ պատրաստել այն (ծիծաղում), այն էլ՝ շատ մանուկ հասակում։

Վերջին անգամ Ձմեռ պապին նամակ եմ գրել…Երբեք չեմ գրել...

Ամանորը մեր ընտանիքում սկսվում է…Դեկտեմբերի 30-ին , միշտ այդ վերջին օրերին ենք տեղադրում տոնածառը և տոնածառի առկայությունն էլ ստիպում է ավելի մոտիկից զգալ Ամանորի շունչը։

Ամանորն ասոցացնում եմ…Ընտանեկան մտերմիկ ջերմության եւ բարության հետ։

Ամանորյա սեղանի իմ ամենասիրելի ուտեստը…Նրբաբլիթներն են (բլինչիկներ):

Ամանորյա իմ ամենասիրելի ֆիլմը…The Holiday ֆիլմը (2006)՝ իմ շատ սիրելի Ջուդ Լոուի, Քեյթ Ունիսլեթի և Քեմերոն Դիասի մասնակցությամբ:

Ամանորի հետ ասոցացնում եմ…Իմ հեղինակած Christmas Day երգը, եւ բոլոր ամանորյա երգերը։

Իմ պատկերացրած հեքիաթային ձմեռը…Արևոտ է, բայց ձյունաշատ, սպիտակ, բայց տաք, ջերմ ու մարդաշատ (Օհ, կարծես՝ հենց նոր մի նոր երգից հատված ստեղծագործեցի... Երգեցիկ հնչեց (ծիծաղում է):

Ձմռանն ինձ ջերմացնում է…Միայն ջերմ մտքերն են ջերմացնում...

2019-ին երազում եմ, որ… Լինեմ ավելի երջանիկ:

Սյունե Առաքելյան

Լուսանկարները՝ Ռաֆայել Փիլոյանի