NEWS.am STYLE-ը շարունակում է առաջարկել հայկական ուտեստների բաղադրատոմսեր։ Յուրաքանչյուր տան տիկին ամեն մի ուտեստ իր ձեւով է պատրաստում, սակայն, եթե առաջին անգամ եք փորձելու կամ չգիտեք թանապուրի պատրաստման եղանակն ու բաղադրատոմսը, ապա այս նյութը հենց Ձեզ համար է։
Թանապուր պատրաստում են տարվա բոլոր եղանակներին։ Այն կարելի է ուտել եւ՛ սառը, եւ՛ տաք, սա ճաշակի հարց է։
Անհրաժեշտ բաղադրիչները․
համեմ – ըստ ճաշակի
ձավար - 100գր․
բրինձ – 100գր․
մածուն - 500մլ․
ալյուր - 2ճ/գդ
սոխ - 1 գլուխ (ըստ ճաշակի)
թթվասեր - 2ճ/գդ․
ձու - 1 հատ
աղ
Պատրաստման եղանակը՝
Ձավարը նախօրոք թրջել։ Ձուն հարել, ավելացնել թթվասերը, մածունը, ալյուրը եւ խառնել այնքան ժամանակ մինչեւ միասեռ զանգված դառնա: Ավելացնել ջուր ու ձավար կամ բրինձ։
Դնել մարմանդ կրակի վրա, անընդհատ խառնելով եփել մինչեւ ձավարի պատրաստ լինելը: Համեմել աղով։ Եռալուց հետո ավելացնել մանրացված կանաչին:
Իսկ եթե սոխեռածով եք սիրում, ապա առանձին թավայի մեջ սոխը տապակել, վերջում ավելացնել պատրաստ ապուրին։
Բարի ախորժակ։