Մակոլեյ Կալկինը համաձայն չէ Մայլք Ջեքսոնի հասցեին մանկապղծության մեղադրանքների հետ

13:16   17 հունվարի, 2019

38-ամյա Մակոյել Կալկինը, ով հայտնի է դարձել «Տանը միայնակ» կատակերգությունում գլխավոր կերպարով, փոփի արքա Մայքլ Ջեքսոնի մտերիմ ընկերն է եղել։ Այդ առիթով նրան հաճախ են հարցազրույցների հրավիրում սկանդալային երգչի մասին։

Օրերս նա հյուրընկալվել է Մայքլ Ռոզենբաումին, եւ կրկին շոշափվել է Մայքլ Ջեքսոնի եւ Կալկինի ընկերության թեման։ Բոլորին հայտնի է, որ աստղերը սկսել են շփվել 90-ականների սկզբին, երբ Կալկինը դեռ 10 տարեկան էր։

Նրանց հարաբերությունները մինչ այժմ մամուլին հանգիստ չեն տալիս, քանի որ Մայքլ Ջեքսոնին բազմաթիվ անգամներ մեղադրել են մանկապղծության մեջ։ Զրույցի ընթացքում Մակոյելը նշել է, որ իր համար դժվար է պարզաբանել լուրերը՝ անկախ նրանից, որ արդեն 20 տարի է անցել։ «Նրա համար հետաքրքիր էր շփվել ինձ հետ, քանի որ այդ ժամանակ ինձ հետ շատ բան էր տեղի ունենում, ես հայտնիություն էի ստացել։ Այո՛, դա տարօրինակ էր, բայց ամեն ինչ այնպես չի եղել, ինչպես կարող էր թվալ։ Մենք իսկական ընկերներ էինք այդ բառի ամենապարզ իմաստով։ Մարդիկ կասկածի տակ են դնում այդ ընկերությունը, քանի որ նա մոլորակի ամենահայտնի մարդն էր»,- Ջեքսոնի հետ հարաբերությունների սկզբնական շրջանի մասին ասել է Կալկինը։

Նա զարմանք է արտահայտել՝ ինչու է հանրությունը ցանկանում արդարացումներ լսել։ «Դու երբեւէ ստիպված եղե՞լ ես պարզաբանել ընկերական հարաբերությունները։ Ինձ համար դա նորմալ էր։ Մյուսները ինչ-որ արտասովոր բան են պատկերացնում, բայց դա սովորական ընկերություն էր»,- պատմել է դերասանը։

Ամենայն հավանականությամբ դերասանին հարցազրույցի են հրավիրել այն պատճառով, որ շուտով տեղի է ունենալու «Լքելով Նեվերլենդը» վավերագրական ֆիլմի պրեմիերան, որում հայտնի երգիչը մանկապիղծի կերպարում է։

Աղբյուրը՝ CNN



© NEWS.am STYLE