Փնտրում եմ երազանքիս ամուսնուն. նորից անհաջողություն
23:08 20 հունիսի, 2013Բարի երեկո:
Հազիվ հասցրել էի ուրախանալ, որ գտել եմ տղամարդուն, ում տեսնելիս ինչ-որ բան ներսումս շարժվում է, երբ հանկարծ…
Արդեն պատմել եմ, որ աշխատում եմ արտասահմանյան ընկերությունում եւ որ Անգլիայից նոր գործընկեր ունենք: Նրա անունը Ջոն է, կանաչ աչքեր եւ առնական կազմվածք ունի: Բայց գլխավորը ժպիտն է, որն ինձ գերեց առաջին իսկ հայացքից… Փորփրեցի նրա փաստաթղթերը եւ իմացա, որ ոչ միայն ամուսնացած է, այլեւ երկու դուստր ունի:
Հետաքրքիր էակներ են այս տղամարդիկ: Հենց որ հեռանում են կնոջից, անմիջապես մոռանում են ընտանիքի մասին: Ջոնն ուշադրության նշաններ է ցուցաբերում իմ հանդեպ: Եթե նախապես միջոցներ չձեռնարկեի, մինչեւ ականջներս կսիրահարվեի: Իսկ հիմա ստիպված էի բացատրել, որ ինչ-որ մեկի ընտանիքը քանդել կամ սիրուհի դառնալ չեմ ցանկանում:
Հիմա փորձում եմ նրա հետ չշփվել:
Վերջ, հոգնել եմ այս փնտրտուքներից: Թվում է՝ բազմաթիվ երկրպագուներ ունեմ, հարկավոր է միայն ընտրել: Բայց ես ուզում եմ այդ անել ոչ թե ուղեղով, այլ սրտով…
Լիլիթ