«Салют талантов» նախագծի շրջանակում վաղը՝ մարտի 26-ին, Երեւանում կանցկացվի «У подножия Арарата» խորագիրը կրող առաջին միջազգային փառատոնը, որի նպատակն է բացահայտել արվեստի բնագավառի տաղանդավոր երեխաներին եւ պատանիներին:
Փառատոնի մասնակիցները կկատարեն դասական գործեր դաշնամուրի նվագակցությամբ, ազգային եւ արտասահմանյան երգեր, կցուցադրեն ազգային, էստրադային եւ միջազգային պարեր:
Փառատոնի ընթացքում կանցկացվի նաեւ հայկական ազգագրական պարին նվիրված վարպետության դաս, որի շրջանակում կխոսվի հայկական պարերի առանձնահատկության եւ տարբերությունների մասին: Դասը կվարի Հայաստանի արվեստի վաստակավոր գործիչ, «Կարին» անսամբլի հիմնադիր եւ տնօրեն Գագիկ Գինոսյանը:
Հանդիսատեսի առաջ ելույթ կունենան մոտ 150 մասնակիցներ՝ Ռուսաստանից, Հայաստանից եւ Ղազախստանից: Ժյուրիի կազմում ներգրավված կլինեն մշակութային եւ հասարական տարբեր գործիչներ:
Մրցույթի գալա-համերգը կկայանա Առնո Բաբաջանյանի անվան համերգասրահում, որի ընթացքում մասնակիցներին կհանձնվեն մրցանակներ:
Միջոցառումը կանցկացվի Երեւանում ռուսական գիտության եւ մշակույթի կենտրոնի աջակցությամբ:
Լուսանկարները՝ փառատոնի ֆեյսբուքյան էջից