Չինական վարձույթում «Բոհեմական ռապսոդիա»-ն կցուցադրվի առանց ԼԳԲՏ տեսարանների

Ֆրեդի Մերկուրիի մասին պատմող կենսագրական ֆիլմը, որում հայտնի երաժիշտի կերպարը մարմնավորում էր Ռամի Մալեքը, հաճույքով դիտել են գրեթե բոլոր կինոմանները։ Այժմ հերթը Չինաստանինն է, ուր ֆիլմը հայտնվել է վարձույթում։ Սակայն երկրի բնակիչները կենսագրական ֆիլմը տեսել են բոլորովին այլ կերպ. հանվել են բոլոր տեսարանները, որոնք ակնարկում են մասնակիցների հոմոսեքսուալության մասին։  

«Բոհեմական ռապսսոդիա»-ն կորցրել է էկրանային ժամանակի ավելի քան 2 րոպե։ Որոշ հատվածներ ջնջվել են «համասեռամոլ» բառի գործածման պատճառով։ Այդ մասին CNN-ին հայտնել է Չինաստանում ԼՋԲՏ ակտիվիստներից մեկը։

Ֆիլմից ջնջվել է Մերկուրիի եւ նրա մենեջեր Փոլ Պրենտերի համբույրը, երգչի եւ նրա ընկերուհու՝ Մերի Օսթինի զրույցը նրա սեռական կողմնորոշման մասին, ինչպես նաեւ էպիզոդը, երբ ամբողջ խումբը կանացի հագուստ է կրում՝ «I Want To Break Free» երգի հիման վրա տեսահոլովակի նկարահանման համար։

Ֆիլմից ջնջվել է նաեւ այն հատվածը, որում Ֆրեդին ծանոթանում է մատուցող Ջիմի հետ, այդ պատճառով անհասկանալի է՝ որտեղից է նա հայտնվում։

Չինաստանում հոմոսեքսուալությունը դադարել է հանցագործություն համարվել միայն 1997թ.-ին, իսկ հոգեկան խանգարումների ցանկից հանվել է միայն 2001թ.-ին։ Չնայած պաշտոնական արգելքների բացակայությանը՝ ոչ հետերոսեքսուալ հարաբերությունների մասին հիշատակումները կտրականապես չեն ողջունվում մշակույթում եւ սոցիալական ցանցերում։