«Դժվարություններ եղել են գործիքավորումը կատարելիս»․Կարեն եւ Սեւակ դուետը Արթուր Գրիգորյանի «10 միլիոն հայ»-ի մասին երգը ներկայացրել է նորովի
15:05 15 ապրիլի, 2019Գործիքավորողներ Կարեն Համբարձումյանն ու Սեւակ Մելքոնյանը օրերս ներկայացրել են իրենց նոր նախագիծը՝ «10 միլիոն հայ» ստեղծագործության հիման վրա, որի հեղինակներն են Արթուր Գրիգորյանն ու Անիտա Հախվերդյանը։ Երգը տարիներ առաջ հայտնի դարձավ Երգի պետական թատրոնի սաների կատարմամբ․ այսօր գործիքավորողներն այն ներկայացրել են նոր տարբերակով՝ նոր երգիչների կատարմամբ։
«Այս երգը ես եւ Սեւակը հավանել էինք առաջին անգամ լսելուց հետո, միշտ ցանկացել ենք մեր խումբն ունենալու դեպքում առաջինը հենց այդ ստեղծագործությանն անդրադառնալ․ այն ուզում էինք ներկայացնել մեր տեսակով»,-NEWS.am STYLE–ի հետ զրույցում նշեց Կարենը։
Անդրադառնալով երգիչների՝ Արեւիկ Գրիգորյանի, Անելիի, Գեորգի Բունիաթյանի, Գրիգոր Դավթյանի ընտրությանը՝ գործիքավորողը նշեց․
«Երգն առաջին անգամ, իհարկե, լսել ենք Երգի պետական թատրոնի սաների մեկնաբանությամբ, որոնք այն հրաշալի են ներկայացրել։ Իսկ երբ տարիների ընթացքում մտածում էինք ունենալ մեր խումբը, միշտ աչքի տակով նայում էինք երգիչներին, ու այս 4 կատարողին էլ մենք ենք ընտրել՝ ելնելով նրանց տեսակից եւ տաղանդից»։
Կարենը եւ Սեւակը տեսահոլովակի շուրջ աշխատել են ռեժիսոր Արեն Բայադյանի եւ օպերատոր Արտյոմ Աբովյանի հետ։ Մտահաղացման վերաբերյալ համատեղ քննարկումներ եղել են,սակայն սցենարային ամբողջական լուծումներն արել է Արեն Բայադյանը։
Կարենն անկեղծորեն խոստովանեց՝ գործն ընտրելուց պատասխանատվության զգացումը մեծ էր․
«Երգի պետական թատրոնի կատարմամբ երգն արդեն շատ էր սիրվել, ինչի համար էլ շատ դժվարություններ ենք ունեցել գործիքավորումը կատարելիս, որովհետեւ կայացած երգին երկրորդ անգամ անդրադառնալը շատ բարդ բան է բոլոր երաժիշտների համար։ Արել ենք գործիքավորման մի քանի տարբերակներ, որոնք մեր դուրը չեն եկել, վերջում ընտրությունը կանգ է առել հենց այս տարբերակի վրա։ Քանի որ երգն էլ Արթուր Գրիգորիչինն է, (բառերը հեղինակել է Անիտա Հախվերդյանը), երգիչների հետ պարապել է հենց Արթուր Գրիգորիչը, որովհետեւ մենք անպայման ցանկանում էինք, որ նա էլ իր խորհուրդերով լիներ նախագծի կողքին»։
Սյունե Առաքելյան