«Որքան էլ մեզ չեն սիրում Թուրքիայում, միշտ ասում են՝ հայերը ստեղծագործ ազգ են». Արտո Թունջբոյաջյան

Ապրիլի 19-ին Արամ Խաչատրյան համերգասրահում կկայանա Հայաստանի պետական կամերային նվագախմբի եւ 5^th Season խմբի համերգը: Կամերային նվագախումբը հանդես կգա գեղարվեստական ղեկավար եւ գլխավոր դիրիժոր Վահան Մարտիրոսյանի ղեկավարությամբ, իսկ 5^th Season խմբի կազմում ելույթ կունենան «Գրեմմիի» մրցանակակիր Արտո Թունջբոյաջյանը,  ՀՀ վաստակավոր արտիստ Վահագն Հայրապետյանը, Սամ Սարյանը եւ կոնտրաբաս Մակար Նովիկովը: Համերգը կրում է Gate of Frequency խորագիրը:

«Մտնում ենք ձայնային հաճախականության մի դաշտ: Բոլորիս գիժ համերգ է սպասվում»,-այսօր՝ ապրիլի 16-ին կայացած մամուլիս ասուլիսի ժամանակ, անդրադառնալով սպասվելիք համերգին, նշեց Վահագն Հայրապետյանը՝ հավելելով, որ ինչպես միշտ՝ Արտո Թունջբոյաջյանի հետ կներկայացնեն բաց իմպրովիզներ, ստեղծագործություններ, որոնք կհնչեն առաջին անգամ կամ նորովի:

Արտո Թունջբույաջյանն ինքն էլ դժվարացավ պատասխանել այն հարցին, թե ինչպիսի համերգային ծրագիր է սպասվում հանդիսատեսին եւ ինչ ստեղծագործություններ է ներկայացնելու, քանի որ երաժիշտը միշտ նվագում եւ երգում է այն, ինչ զգում է տվյալ պահին.

«Երաժշտությունն ինձ համար իմ կյանքի ձայնն է, դա մարդու անկեղծ մտածողությունն է: Կարեւոր է այդ ճիշտ մտածելու ձեւին հասնելը: Ցանկացած մասնագիտության դեպքում դա նույնն է: Բնությունը պետք է առողջ ձեւով օգտագործել, բոլոր մասնագիտությունների մեջ էլ մի բան պետք է անկեղծ ձեւով ստեղծել: Որքան էլ մեզ չեն սիրում Թուրքիայում, միշտ ասում են՝ հայերը ստեղծագործ ազգ են»,-նշեց Արտո Թունջբոյաջյանը՝ մի փոքր ափսոսանքով հավելելով. «Հայաստանում շատ տաղանդավոր երիտասարդներ կան, բայց ցավոք այստեղ չեն կարողանում օգտագործել իրենց մտքերն ու ստիպված գնում են այլ երկրներ: Մեծերը պետք է միշտ նրանց կողքին լինեն: Մարդ լինելը մեր հիմքն է, բայց ազգ լինելը տվյալ մարդու համեմունքն է»:

Խոսելով Արտո Թունջբոյաջյանի հետ իրականացվելիք երաժշտական փորձարկումների մասին՝  Վահան Մարտիրոսանը նշեց.

«Ամբողջ երաժշտական պատմությունն է էքսպերիմենտ: Ոմանց մոտ դա ստացվել է, ոմանց մոտ՝ ոչ: Իրականում մենք էլ չգիտենք՝ ինչ կստացվի արդյունքում: Մենք մեր նոտաներն ենք նվագելու, դրանց գումարվելու են Արտոյի միքսերը: Էքսպերիմենտներ անելը մեր աշխատանքն է»:

Համերգի կազմակերպիչները նշում են՝ դեռեւս նույն ծրագրով դրսում ներկայանալու ռեալ հեռանկարներ չկան.

«Այստեղ ներկայանալուց հետո միայն կհասկանանք՝ արժե՞ համերգը ներկայացնել նաեւ դրսում, թե՞ ոչ»,-եզրափակեց Վահան Մարտիրոսյանը:

Սյունե Առաքելյան