«Դեռ մոտ չէ այն օրը, որ ես զոքանչ ունենամ». «Հայաստանի Ձայնը 4»-ի հաղթող Հայկ Ղուլյանի «պայքարը» հումորային տեսահոլովակում

«Հայաստանի Ձայնը» նախագծի 4-րդ եթերաշրջանի հաղթող Հայկ Ղուլյանն օրերս ներկայացրել է իր նոր տեսահոլովակը՝ անդրադառնալով հայտնի ֆոլկ ստեղծագործության ու տղամարդկանց «ամենասիրելի» էակներին՝ զոքանչներին: Երգչի «Զոքանչ» տեսահոլովակում գլխավոր հերոսուհուն մարմնավորում հումորային ժանրի հայտնի դերասանուհի, ՀՀ վաստակավոր արտիստ Լուսինե Կիրակոսյանը:

NEWS.am STYLE-ը որոշեց Հայկից պարզել՝ ինչո՞ւ է երիտասարդ երգիչը որոշել անդրադառնալ հենց զոքանչների թեմային. Չլինի՞ արդեն գտել է իր զոքանչին: Մեր հումորային հարցադրմանը Հայկը պատասխանեց ծիծաղելով.

«Չէ, ճիշտն ասած` դեռ մոտ չէ այն օրը, որ ես զոքանչ ունենամ, կամ էլ նա կա, բայց ես չեմ ճանաչում դեռ իրեն: Իսկ թեման ընտրվել է, որովհետեւ սա ֆոլկ ժանրի շատ լավ երգ է: Տարբեր երգիչներ կատարել են այն ու լսելուց հետո հասկացա, որ ցանկանում եմ ես էլ երգել, քանի որ դրա մեջ ճիշտ, դրական ու արեւոտ տարրեր կան, որոնք ես ցանկացա փոխանցել: Հումորային, կատակ երգ է, որը զգացի, որ պետք է պարզապես երգեմ»:

Տեսահոլովակում նկարահանվել է մեր շատ սիրելի Լուսինե Կիրակոսյանը, որին անչափ շնորհակալ եմ համաձայնության համար, որովհետեւ կարծում եմ` այլ պարագայում հաստատ չէինք ունենա այս արդյունքը»:

Ինչպես շատերը՝ Հայկն էլ լավ ծանոթ է զոքանչների մասին անեկդոտներին, սակայն ասում է. «Զոքանչների մասին անեկդոտները շատ են, իսկ ճշմարտություն տեսնում եմ դրանց մեջ, թե ոչ, չգիտեմ (ծիծաղում է): Այս տեսահոլովակում չգիտեմ, թե որքանով է ստացվել, որ փոխանցենք այն հաղորդագրությունը, որ հիմա ամեն ինչ այնքան ձեւական ու պայմանավորված է դարձել, իսկ նախկինում զոքանչների հետ այդ կոնֆլիկտն այնքան «համով» էր, այնքան ճիշտ էր, այնքան բարություն կար այդ ամեն ինչի մեջ: Հիմա, ասես, ամեն ինչ շատ բարի է ու լավ, բայց այնքան կեղծավորություն կա դրանում: Դրա համար տեսահոլովակում մենք ներկայացրինք այն հին ժամանակները, երբ զոքանչն ասում էր. «Աղջկաս չեմ տա քեզ», ու փեսան փայքարում էր նրա համար»:

«Հայաստանի Ձայն»-ի հաղթողի հետ զրույցում բնականաբար չէինք կարող շրջանցել նախագծում հաղթանակի ու դրա տված հաջողության թեման.

«Հաղթանակը չգիտեմ` որքանով օգնեց, բայց «Հայաստանի Ձայնն», առհասարակ, ինձ շատ բան տվեց: Իհարկե, չեմ թաքցնի` շատ էի ցանկանում հաղթել: Առհասարակ, եթե գնում ես նման քայլի, պետք է ամեն ինչ անես հաղթելու համար: Նախագիծն ինձ շատ մեծ ճանաչում է տվել, ինչի համար շնորհակալ եմ կազմակերպիչներին»:

Հարցին արդյոք չի՞ ցանկանում հետեւել իր կոլեգաներից շատերի օրինակին եւ ներկյանալ նաեւ արտերկրում՝ միջազգային նախագծերում՝ Հայկը պատասխանեց.

«Դեռ դրսի որեւէ մրցույթի մասին չեմ մտածում, բայց, միգուցե, գա ժամանակ, որ հասկանամ, որ դա պետք է»:

Ինչ վերաբերում է հաջորդ երգին՝ «Այն կլինի լավ, բարի, այսօրվա սիրո պատմություն է ներկայացնելու»,-խոստացավ երգիչը:

Սյունե Առաքելյան

Լուսանկարները տրամադրել է Հայկ Ղուլյանը