Ջենիֆեր Լոպեսը՝ Թուրքմենստանի նախագահի ծննդյան ժամանակ ելույթի մասին (վիդեո)

Ամերիկյան երգչուհի եւ դերասանուհի Ջենիֆեր Լոպեսը չէր համաձայնի ելույթ ունենալ Թուրքմենստանի նախագահ Կուրբանգուլի Բերդիմուհամեդովի ծննդյան տարեդարձի առիթով, եթե իմանար, թե մարդու իրավունքների հետ կապված  ինչպիսի խնդիրներ կան այդ երկրում: Այս մասին հաղորդում է ИТАР-ТАСС-ը՝ հղում կատարելով աստղի ներկայացուցիչներին: Ավելի վաղ երգչուհուն քննադատել էր մարդու իրավունքների հիմնադրամը:

Լոպեսի ներկայացուցիչը նշել է, որ Թուրքմենստանում ելույթը «մասնավոր կորպորատիվ միջոցառում էր», որը կառավարության կողմից չէր ֆինանսավորվում: Ամեն դեպքում, ԶԼՄ-ների տվյալներով, ելույթի համար երգչուհին շուրջ 1 մլն դոլար է ստացել: Նշվում է, որ հանդիսատեսին ներկայանալուց ընդամենը մի քանի րոպե առաջ Լոպեսին խնդրել են բեմից շնորհավորել Բերդիմուհամեդովին:

Հիշեցնենք, որ Ջենիֆեր Լոպեսը ելույթից հետո Թուրքմենստանի նախագահի համար կատարել է ավանդական Happy birthday, mister president երգը, իսկ Ֆիլիպ Կիրկորովը, ով նույնպես ելույթ է ունեցել տարեդարձին, Բերդիմուհամեդովին շնորհավորել է թուրքմեներեն: «Թանկագին նախագահ, շնորհավորում եմ Ձեր ծննդյան տարեդարձը: Ես ուրախ եմ նորից Ձեզ հետ լինելու համար»,- ասել է նա: