Դիետոլոգ Էլենի Կարապետյանը, հաշվի առնելով հսկայական քանակությամբ նամակներն ու հաղորդագրությունները, որոշել է առանձնացնել ամենից հաճախ տրվող հարցերը:
1. Որքա՞ն ժամանակահատվածում ես կնիհարեմ:
Ամեն ինչ անհատական է, կախված է ձեր օրգանիզմից, ճիշտ սնվելուց, մարզվելուց եւ ճիշտ մոտեցումից: Հիշեք, որ նիհարելու համար ոչ մի հրաշք-միջոց չկա: Գեղեցիկ կազմվածքի կհասնեք միայն համբերության եւ աշխատելու արդյունքում:
2. Ճի՞շտ է, որ որոշ մարդիկ չեն կարող բարեկազմ լինել գեների պատճառով:
Ո՛չ: Դա ամենամեծ առասպելն է: Յուրաքանչյուր մարդու կենսակերպը, այլ ոչ թե գենետիկան է դեր խաղում այն հարցում, Դուք բարեկազմ, թե՞ գեր կլինեք:
3. Ինչպե՞ս նիհարել փորի/ոտքերի եւ մարմնի այլ հատվածներում:
Ոչ մի կերպ: Մասնակի նիհարել անհնար է: Եթե մարդը նիհարում է, ճարպը նվազում է ամբողջ մարմնում:
4. Խիստ դիետան նիհարելու ամենից հասանելի եւ արագ միջո՞ցն է:
Իրականում խիստ դիետան ավելի շատ գիրանալու ամենից պարզ միջոցն է: Մեծ մասը, ովքեր մեկը մյուսի հետեւից իրենց վրա տարբեր դիետաներ են փորձում, արդյունքում ավելի արագ են գիրանում: Պատճառը նյութափոխանակության խանգարումն է:
5. Նիհարելու ժամանակ ֆիզիկական ծանրաբեռնվածությունը պարտադի՞ր է:
Առաջին հայացքից պարտադիր չէ, քանի որ կարելի է կրճատել սննդի կալորիականությունը: Բայց հարկ է նկատել, որ ֆիզիկական վարժություններ կատարելիս խթանում եք սրտի աշխատանքը, ակտիվացնում եք նյութափոխանակությունը: Այդ կերպ խթանում եք գործընթացները, որոնք նպաստում են նիհարելուն:
Էլենի Կարապետյան