Ալլա Պուգաչովան Յուրմալայում 500 հազար եվրո արժողությամբ նոր բնակարան ունի

18:13   19 հուլիսի, 2019

Ռուսական էստրադայի աստղ Ալլա Պուգաչովան Ռիժսկի ծոցում հանգստի մեծ երկրպագու է։ 70-ամյա երգչուհին յուրաքանչյուր տարի վիլլա է վարձում, ուր ամուսնու՝ Մաքսիմ Գալկինի եւ երեխաների՝ Լիզայի եւ Հարրիի հետ մի քանի ամիս է անցկացնում։ Նա այստեղ կարող է հասնել գնացքով. Ալլա Բորիսովնան, առողջական վիճակով պայմանավորված, վաղուց ինքնաթիռ չի նստում, բացի այդ՝ Լատվիայում է գտնվում Պուգաչովայի մտերիմ ընկերուհու՝ Լայմա Վայկուլեի բնակարանը, գրում է EG-ն։

Այս տարի երգչուհին շատ կարեւոր որոշում է կայացրել՝ երկրում անշարժ գույք ձեռք բերել։ Պրիմադոննան 100 քառակուսի մետր մակերերով բնակարան է գնել, որը գտնվում է Յուրմալայի կենտրոնում։ Բնակարանի արժեքը կազմում է 500 հազար եվրո կամ 35 մլն ռուբլի։

Ամենայն հավանականությամբ, Ալլա Բորիսովնային այս տարի չի հաջողվի բնակություն հաստատել այնտեղ. անշարժ գույքը, որպես կանոն, վաճառում են միայն պատերը կառուցված վիճակում։ Այնպես որ երգչուհին ստիպված կլինեի տանը վերանորոգում կատարել եւ կահավորել։ Սակայն արդեն հաջորդ տարի Պուգաչովան կարող է հանգիստը վայելել սեփական բնակարանում։ Ի դեպ, բնակարան գնելու հետ մեկտեղ էստրադայի աստղը Լատվիայում բնակության իրավունք է ստացել, որը տրվում է 250 հազար եվրոյից սկսվող անշարժ գույք ձեռք բերելու համար, գրում է «Аргументы Недели»-ն։

Լուսանկարները՝ KinoPoisk, Instagram



© NEWS.am STYLE