Ամերիկյան կուլտային Metallica խումբը համերգով հանդես է եկել Մոսկվայում, եւ այդ երեկոն ռուսները կհիշեն ընդմիշտ։ Բասիստ Ռոբ Տրուխիլիոն բոլորի համար անպասելի կերպով սկսել է կատարել Վիկտոր Ցոյի «Группа крови» կուլտային երգը։ Դահլիճն անսպասելիությունից նախ քարացել է, ապա սկսել երգել նրա հետ։
Ելույթի ավարտին մեծ էկրանին հայտնվել է Ցոյի լուսանկարը։ Յուրօրինակ պահի տեսագրությունը YouTube-ում հրապարակել են համերգին ներկա գտնվածները։
«Группа крови» երգը ներառված էր նույնանուն ալբոմի մեջ, որը «Կինո» -ն ներկայացրել է 1988թ.-ին։ Այն առաջին անգամ կատարվել է 1987թ.-ի հունիսի 3-ին լենինգրադյան ռոք ակումբի հինգերորդ փառատոնին։
Հիշեցնենք՝ Metallica-ն սովորություն է դարձրել արտասահմանյան իր համերգների ընթացքում տեղական խմբերից որեւէ մեկի ինչ-որ երգ կատարել։ Նույն շրջագայության շրջանակներում ամերիկացիները Բեռլինում ներկայացրել են Rammstein խմբի «Engel» երգի իրենց տարբերակը։ Հիշեցնենք՝ այն եւս շուտով հանդես կգա Ռուսաստանում։
Լուսանկարները՝ ТАСС/Гавриил Григоров